aiaraldea.eus

"Klima aldaketa eta Asiako liztorra ezti ekoizpenerako mehatxu handiak dira"

Erabiltzailearen aurpegia Aitor Aspuru Saez   Ingurumena  Orozko

IÑIGO MACIAS (Orozko, 1973) ezti ekoizlea da. Bilboko Santo Tomas Azokako saria eskuratu du aurten. Duela 10 urte hasi zen eztia ekoizten eta egun bere ogibidea bilakatu da.

"Klima aldaketa eta Asiako liztorra ezti ekoizpenerako mehatxu handiak dira"
Lehen saria jaso zuen Iñigo Maciasek Bilboko Santo Tomas azokan. | Ikusi handiago | Argazki originala

Lehenik eta behin, Santo Tomas Bilboko Azokako saria jaso duzu. Zer izan da zuretzat aitorpen hori jasotzea? Sari gehiago jaso dituzu?
Alde batetik, berria eman zidatenean kriston poza hartu nuen, ez nuen sinesten. Bestetik, aitorpen pertsonala eta nire markarentzat bultzada itzela zela pentsatu nuen.

Aurten ere Ermuko azokako saria jaso nuen, milalore eztiagatik izan zen. Gauzak hala, 2017a niretzat urte borobila izan dela esan dezaket.

Epaimahaiak zer hartzen du aintzat eztia baloratzeko?
Kontuan hartzen dituzte, besteak beste, zaporea, kalitatea, umeltasuna…

Duela denbora asko hasi zinen eztia ekoizten?
Duela hamar urte hasi nintzen ezti ekoizle moduan jarduten hemen, Orozkon bertan, nire bikotekidearen osabarekin. Lanbide berri hau ikasten hasi nintzen, eta gero eta gusturago nengoenez, ezti ekoizlea izango nintzela erabaki nuen.

Orain dela hiru urte hasi nintzen Eusko Label markarekin lanean.

Nola ekoizten duzu eztia?
Bi ezti mota ekoizten ditut. Alde batetik, Milalore deitzen dena eta, bestalde, Txilarko eztia, biak Orozkoko herrian ekoiztuta.

Nire eztia guztiz naturala da, hondakin gabekoa. Getariako kooperatiban erlauntzetik eztia ateratzen dut.

Salmentarako erabiltzen ditut, besteak beste, Orozkoko museoa, Eroski... eta noski, nire baserria, Orozkoko Zaloa auzoan dagoena.

Zeintzuk dira zure lanaren alderik onenak eta okerrenak?
Nire aburuz, lanaren alderik onenak dira: askatasuna, ez daukadala nagusirik eta, beraz, nire ordutegiak moldatzen ditudala; eta, zalantzarik gabe, mendian egotea eta erleekin lan egitea.

Bestalde, alderik okerrenen artean azpimarratu behar ditut klima aldaketa eta Asiako
liztorra. Izan ere, arazo hauek kezkatzeko modukoak dira. Dakizuenez, ekoizpenean eragina dute.

Urtero ekoizpena aldakorra da, adibidez, aurtengoa bikaina izan da; baina datorren urtekoa, batek daki.
 
Erleei lotutako produktu gehiago lantzen dituzu?
Batez ere eztia, hurrengo urterako propolio eta polen produkzio txikia ateratzeko asmoa daukagu.

Nolakoa da erleekin harremana, askotan ziztatu zaituzte?
Milaka ziztada, baina gure lanbidean oso arrunta da, denboragaz sorgortu naizela esan dezaket.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa