Hirugarrenez jarraian, Adiek jaso du babes gehien Orozkon. 746 herritarrek egin dute talde independentearen alde, bozkatzaileen %49,18k. Horri esker 6 zinegotzi lortu ditu, eserlekuen gehiengoa, beraz, ez du pakturik egin beharko gobernatzeko. EAJk 401 boto jaso ditu (%26,43) eta 3 zinegotzi izango ditu. EH Bilduk 2 ordezkari izango ditu udalean, 285 botori esker. Gauzak horrela, Orozkoko udalak aurreko legealdian izandako ordezkari kopuruak mantenduko ditu.
Talderik bozkatuena izan den arren, Adiek behera egin du boto kopuruan. Oraingoan 32 gutxiago izan ditu. Gainontzeko alderdiek bilakaera positiboa izan dute eta aldea oso nabaria ez bada ere, aldeko bozka gehiago jaso dituzte guztiek.
Udalbatza osatzeko hauteskunde hauetan 2.075 herritar zeuden deituta bozkatzera, eta 1.571 orozkoarrek erantzun diote deialdiari. Abstentzioa, beraz, %24,29 izan da, 2015ean baino %0,41 gehiago. Espainiako Barne Ministerioak baieztatu duenez, 32 bozka zuri egon dira, eta 54 izan dira baliogabeak.
Zinegotzien zerrenda berria
Ondorioz, ondorengo zinegotziek osatuko dute Orozkoko Udala:
- Pedro Maria Intxaurraga Sautua (ADIE)
- Idoia Camacho Markina (ADIE)
- Jose Urraza Aldayturriaga (ADIE)
- Berenice Rodriguez Garcia (ADIE)
- Juan Jose Lazcano Ortueta (ADIE)
- Zuriñe Urquijo Arbaiza (ADIE)
- Ainara Apraiz Oliden (EAJ)
- Estanis Etxebarria Goti (EAJ)
- Estibalitz Minguez Manzarbeitia (EAJ)
- Pili Garcia Palacios (EH Bildu)
- Samuel Pasandin Sanchez (EH Bildu)