aiaraldea.eus

[BIDEO ERREPORTAJEA] Orozkoko sanantolinak, iraileko pizgarri

Erabiltzailearen aurpegia Erredakzioa   Kultura  Orozko

Abuztuaren 30etik irailaren 4ra arte egon da jaietan buru-belarri Orozko. Ostiralean izan zen txupinazoa. Suziria jaurti aurretik, ordea, nola gazte egun ahala pala partidak antolatu zituzten. 

19:00etan izan zen hitzordu nagusia Zubiaur plazan. Ohi legez, jende mordoa batu zen udaletxe inguruetan Atxulaur futbol taldekoen pregoia entzuteko. Irakurtaldi parte hartzailearen bidez zabaldu zuten mezua, hitzartzea klubean zein jaietan zentratzen. Suziriarekin batera lehertu zen festa, eta kalejirek zein buruhandiek hartu zuten herria. Iluntzean, berriz, sardina jana eta kontzertuak egon ziren gune ezberdinetan. 

Larunbatean, aldiz, marmitako txapelketa izan zen goizaren osagaietako bat. Horrez gain, Orozkoko harana kale pintura lehiaketaren bigarren edizioa antolatu zuten. Artelanak igandera arte jarri dituzte ikusgai Orozkoko Museoan.

Bestalde, Zapatu Morea gauzatu zuten emakumeen parte hartzea eta ikusgarritasuna areagotzeko. Goizean emakume sortzaileen azoka prestatu zuten, esaterako.

Potolari bertso eskolak eta herriko trikitilariek, berriz, kalejira berezia egin zuten; Andoni Egaña eta Igor Elortza bertsolariek jarri zioten gatza eta piperra. 

Kalejirek ez zuten etenik izan larunbatean, zapatu morearen barruan feminismoa ikuskizunez jantzi baitzuten orozkoarrek. Hain zuzen, 4 Eme antzerki-dantza, ektialdi feminista eta Yogurinha Borova zein Las Tea Partyren emanaldiak eskaini zituzten txosnagunean. 

Jai giroa, baina, herri osora hedatu zen. Horren adierazle da DJ Markelinen disko saioa, Zubiaur plazan ordu txikiak arte aritu baitziren gazteak dantzan.

Martitzenean izan zen haurren txanda, hots, umeen eguna. Orotariko ekintzak izan zituzten, baina mozorro lehiaketan erakutsi zuten euren irudimena. Ildo beretik, umeen margo txapelketako sari banaketa egin zuten. 

Ezker pareta txapelketa herrikoiaren finala ere jokatu zuten asteartean. Zezen plaza bezain beste bete zen frontoia pilotariak ikusteko.

Gauzak horrela, eguaztenean heldu zen egun handia: Berakatz Eguna. Urtero moduan jokopotearekin hasi zuten goiza. Partaideek proba ezberdinak gainditu behar izan zituzten. Ondoren herri bazkari agroekologiaren bitartez berreskuratu zituzten indarrak. Orozkoko Udalak positiboki baloratu ditu aurtengo jaiak.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa