Garaipena Artiachen: Kaleratutako lau emakumeak berriz onartu eta finko egingo dituzte

Lau langileak, epaitegiaren aurrean. / Aiaraldea.eus

Atzo sinatu zuten akordioa bi aldeek. Kasuak izandako oihartzunak eta eginiko mobilizazioek aldatu dute enpresaren jarrera, udan ez baitzegoen negoziatzeko prest.

Artiachetik kaleratutako lau emakumeak berronartu eta finko egingo dituzte. Hala jakinarazi du LAB sindikatuak prentsa ohar baten bidez. Akordioa sinatu zuten atzo langileek eta zuzendaritzak. Udazkenean egin zuten lehen epaiketa, emakumeetako baten kasuarekin. Bere kaleratzea baliogabetzat jo zuen epaileak, baina enpresako zuzendaritzak epaia errekurritu zuen.

“Urtarrilaren 16an beste epaiketa bat egin behar zen, baina bertan behera uztea erabaki genuen akordio kolektibo batera heltzeko asmoarekin. Orain akordioa sinatu da 4 langile berronartzearekin”, azaldu du sindikatuak, “akordioa lortu ondoren, jarraipena egingo dugu enpresak enpresa-batzordearen aurrean iragarri duen kontratazio politikaren aldaketa etorkizuneko kontratazio-politika gardena izan dadin”.

Urtebete borrokan
Modu horretan eman zaio amaiera ia urtebete luzatutako lan gatazkari. 2019  hasieran jo zuten emakumeen lan ikuskaritzara. Urte asko zeramaten Artiachek Orozkon duen fabrikan lanean (6-17 urte artean), baina enpresak ez zituen finkoak egiten. Behin behineko kontratu batetik bestera salto arazi egiten zien zuzendaritzak. Ainhoa Marigortaren egoera bereziki deigarria zen: 16 urtetan behin behineko 750 kontratu egin zizkion enpresak.

“Behin behineko kontratuekin nazkatuta amaitzen duzu. Ez duzu familia bizitzarik, telefono-deiaren zain zaudelako uneoro. Zure bikotekidearekin eztabaidatzen duzu lanagatik. Dena utzi behar duzu”. Hala azaldu zuen beste emakumeetako batek, Amaia Laconchak, Aiaraldea hedabidean eginiko elkarrizketa batean.

Lan ikuskaritzak arrazoia eman zien langileei: fabrikan behin behinekotasun handia dagoela eta enpresak emakumeei kontratu mugagabea egin behar ziela ondorioztatu zuen. Artiachek, ordea, beste gauza bat egitea erabaki zuen: langileekin zuen lan harremana etetea, kaleratzea, alegia.

Orduan ekin zioten emakumeek egoera salatzeari. Hedabideetara jo zuten euren egoeraren berri ematera, eta oihartzun zabala lortu zuten, egunkari, irrati eta telebista askotan agertu baitzen euren kasua.

Mobilizazioak egin zituzten gero. Lantegiaren aurrean egin zuten lehena, eta Laudion bigarrena. Azken hori nahiko jendetsua izan zen, herritar ugari bertaratu baitziren kaleratutako emakumeei babesa eta elkartasuna adieraztera.

Ziurrenik, ekimen horiek izan ziren balantza langileen alde mugitu zutenak. Udan (manifestazioak egin baino lehen) adiskidetze-egintzak egin zituzten, baina enpresa ez zen horietako batera ere ez bertaratu. Oraingoan (mobilizazioen ostean), enpresa prest agertu da negoziatzeko eta emakumeen bi aldarri nagusiak abian jartzeko (berriz onartu eta kontratu finkoa egitea).

Bigarren garaipena oso denbora gutxian
Artiachekoarekin bi dira Aiaraldeko langile mugimenduak azken bi hilabeteetan lortu dituen garaipenak. Abendu hasieran aurreakordioa lortu zuten Berriak supermerkatuetako langileek enpresako zuzendaritzarekin, hainbat lanuzte egin eta greba mugagabea abiatzeko deia mahai gainean jarri ostean.

Bada antzekotasunik bi borroken artean: egoera prekarioan dauden emakumeak izan dira protagonistak Artiachen zein Berriaken, eta herritar ugari batu dira bi lan gatazkak salatzeko egin diren mobilizazio eta ekimenetara. Aiaraldeko Mugimendu Feminista, adibidez, oso presente egon da bi borroketan, “elkartasun feminista” helarazteko.

Erlazionatuak

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide