Naia Landaluzek amaitutzat jo du Estatu Batuetako esperientzia akademia eta kirol munduan eta ez da Campbellsville unibertsitatera itzuli ikasturte hasieran. "Erabaki oso gogorra" izan dela adierazi du jokalariak. Hala ere, Kentuckyko lagunak, unibertsitatea eta taldea atzean utzi ditu bere ametsa betetzeko: Athletic Clubean aritzea.
Hasieran zalantzak izan bazituen ere, Landaluzek erabaki irmoa hartu du: "Orain esan ahal dut oso pozik nagoela. Txikitatik edonork amestu dezakeen klub batean nagoelako, eta niretzat aukera galanta da jokalari gisa hobetzeko".
Gakoa, konfinamendua
Erabateko aldaketa hori gertatzeko, futbolariaren hitzetan, itxialdia eta pandemia izan dira gakoak. Hasieran Ameriketara itzultzeko asmoa izanik, 3 hilabete etxean igaro ostean, bestelako iritzia zuen: "Konfinamendua gauza positiboak eman zizkidan, zalantzak argitzea eta nire gorputza fisikoki eta mentalki indartzea".
Berez, udan hainbat talde jarri ziren berarekin harremanetan eta, azkenean, Athletic Reto Iberdrola taldean -Athletic B- jokatuko du 2020/2021 denboraldian.
Zehazki, igandean hasi zen txapelketa eta hasierako hamaikakoan egin zuen orozkoarrak debuta. Athletic 77. minutuan jarri zen aurrean markagailuan Lezaman, baina azkenean Segull klubak 1-2 irabazi zuen.
Nabarmendu beharra dago Lezama ez dela arrotza orozkoarrarentzat, entrenamendu teknikoetan parte hartzeko deitu baitzuen Athleticek 2016an.
Ikasketak
Gauzak horrela, eta nahiz eta bere ametsa bete, Landaluzek ez ditu ikasketak alboratu, Ingeniaritza egiten baitago.
