Duela hamar urte bertan behera geratu zen Jesurin eraiki nahi zuten parke eolikoa. Orain, ordea, egitasmo bera abiatu nahi du beste enpresa batek. Mendiak Aske! taldeak horren berri eman zuen abenduan Orozkon, baina daukan informazio guztia partekatuko du ostiralean 19:30ean Donibane Aretoan.
Hori ez ezik, mendi ibilaldia antolatuko dute igandean. Zubiaur plazatik aterako da ekimena 8:00etan. Arrolan egingo dute hamaiketakoa.
Bi deialdiak antolatzen lagundu duen orozkoar batek Aiaraldea Komunikabideari adierazi dio asmoa dela ahalik eta gehien zabaltzea parke eoliko berriak eragingo dituen kalteak Orozkon eta inguruetan.
Horrez gain, talde egonkorra antolatzen hasi dira mobilizazioak eta ekintzak antolatzeko. Duela hamar urte baino gehiago mobilizazio aroa ireki zuen Aiaraldean Guascor enpresak iragarritako energia proiektuak. Orozkon, adibidez, herri galdeketa egin zuten 2011ko ekainean eta gehiengoa azpiegituraren kontra agertu zen. Baina, horrez gain, adierazpen bateratua egin zuten Amurrio, Laudio eta Orozkoko alkateek.
Mendiak aske! taldeko kide bat elkarrizketatu zuen Aiaraldea Komunikabideak iragan astean, parke eolikoaren proiektuaren nondik norakoak ezagutzeko: