Gizonezko batek Orozkoko zenbait neska gazte jazarri ditu, Matxintxu elkarteak salatu duenez. Orozkon ez ezik, inguruko beste herri batzuetan ere gertatu dira erasoak, Ugaon kasu. Hargatik, elkarretaratzeak egin zituzten bi herri bizkaitarretan atzo. Izan ere, Orozkoko neska gazte zein emakume nagusiagoek jazarpena salatu dute, gizonezko baten eskutik. Epai bideari, ordea, ezin izan diote heldu; poliziak adierazi dienez, eraso edo gertaera fisikorik ezean ezin duela ustezko erasotzailearen aurka jo.
Erasoen larritasuna eta jarrera matxistekiko gaitzespena azaleratzeko mobilizazioa egin zuten atzo 20:00etan Zubiaur plazan. Jendez lepo bete zen plaza, eta elkarretaratzearen bidez, emakume erasotuei babesa adierazi, eta eraso matxistarik onartuko ez dutela berretsi zuten. "Eraso matxistek ez dute tokirik ez Orozkon ez inon", azpimarratu zuten.
Elkarretaratzea egin dute Orozkon azken asteetako eraso matxistak salatzeko. Jendez eta aldarriz bete da plaza: pic.twitter.com/m7fxXERYB0
— Aiaraldea.eus (@aiaraldea) February 18, 2022
Orozkoko Udalak adierazpen instituzionala plazaratu zuen, gertaeren harira. "Mota honetako erasoak gure gizartean oraindik nagusi diren indarkeria matxistaren eta genero desberdintasuneko jarreren adierazpenik higuingarrienak dira eta Udalak guztiz gaitzesten ditu. Ezinbestekoa da lanean jarraitzea, gizartea eta herriko giza eragileekin batera, balioetan oinarritutako heziketaren eta gizon eta emakumeen arteko berdintasunaren alde. Beharrezkoa da, halaber, azpimarratzea horrelako jarrerak eragiten dituzten faktoreetan egunez egun esku hartzen jarraitu behar dela", aipatu dute oharrean.
Laudioko Institutuan, bestalde, astelehen goizean -otsailaren 21ean- egingo dute kontzentrazioa, 11:00etan.