Orozkoko Matxintxu elkarteak eta Laudio Institutuko ikasleek aurretik egin bezala, Orozkoko Udalak adierazpen bateratua plazaratu du azken astean herrian jazotako eraso sexistak salatzeko. Gizon batek udalerriko hainbat neska gazteri jarraitzen, jazartzen eta lekuz kanpoko iruzkinak egiten aritu da iragan astean, eta udaleko talde politiko guztiek bat egin dute gertaera horiek arbuiatzeko.
Adiek, EH Bilduk eta EAJk adierazpen instituzional bateratua plazaratu dute erasoa salatuz. Hiru talde politikoen iritziz, gertaera hauek ezin dira egoera isolatu bat bezala ulertu: "Patriarkatuaren DNAn dagoen egiturazko indarkeria mota da, eta sistemaren funtzionamendurako ezinbesteko tresna da. Izan ere, indarkeria matxista baliabide indartsua da emakumeen eta gizonen arteko botere-harremanei eusteko". Azpimarratu dutenez, herritar orok du indarkeria mota honen aurka egiteko ardura.
Gauzak horrela, Orozkon ordezkaritza politikoa duten taldeek uste dute "egungo antolaketa eta ordena soziala eraldatzea" ezinbestekoa dela eraso sexistekin amaitu eta "pertsonen arteko harremanen sistema berri bat" eraikitzeko.
Besteak beste, egungo maskulinitate eredu hegemonikoa eraldatzeko beharra azpimarratu dute: "Bere burua kontrolatu ezin duen, nahitaez oldarkorra den, bere sena menderatu ezin duen gizon baten irudia da maskulinitatearen estereotipo hedatuenetako bat. Maskulinitate-estereotipo hori arrisku-faktore bat da: emakumeentzat eta haurrentzat, baina baita beste gizon batzuekiko harremanean; gizonentzat beraientzat ere".
Salaketa irmoa
Testuinguru honetan erakunde publikoen papera eta erantzukizuna azpimarratu nahi izan dute Adiek, EH Bilduk eta EAJk, eta irmoki arbuiatu dituzte azken astean jazotako eraso sexistak. Orozko Udalak eskura dituen baliabide, tekniko, juridiko eta psikologikoak jarriko ditu erasoa jasan duten pertsonen mesedetan.
Halaber, horrelako gertaerak udaletxean bertan edota Ertzaintzan salatzeko deia egin dute.