Alaitz Aramendi euskal preso orozkoarrak bizi duen egoera salatzeko agerraldia egin du gaur Sarek Orozkoko frontoian. Bertan izan dira, besteak beste, Joseba Azkarraga Sareko bozeramailea. “Bizi osorako zigorrik ez! Alaitz etxera” lelopean 7/2003 eta 7/2014 legeen aplikazioen ondorioz sortutako egoera salatu dute.
Aramendi 7/2003 legearen aplikazioaren ondorioz 40 urteko espetxe zigorra betetzen ari da; eta, 7 /2014 legediaren aplikazioaren ondorioz, ordea, Frantziar Estatuko espetxe urteak ez zaizkio kontabilizatuko
Aramendi 7/2003 legearen aplikazioaren ondorioz, 40 urteko espetxe zigorra betetzen ari da. Kondena "bizi osorako espetxe zigor" bezala deskribatu dute. "Salbuespenekoa den legedia baten barruan epaitu eta zigortu dute Alaitz, espetxealdi amaigabe batera kondenatuz, honek dakartzan kalte psikologiko eta fisikoekin" adierazi du Azkarraga bozeramaileak.
7/2003 legedia ez ezik, 7 /2014 legedia ere aplikatu zaio Alaitz Aramendiri. Ondorioz, Frantziar Estatuko presondegietan igarotako espetxealdia ez zaio kontabilizatuko, eta osorik bete beharko ditu Audientzia Nazionalak ezarritak0 40 urteak.
"Alaitzek 13 urte bete ditu Frantziako kartzeletan eta Europar Batasunak ezarritako arauen arabera, Europako zigor epaitegi ezberdinetan ezarritako zigorrak baliokideak izan beharko lirateke, hau da, Alaitzek Frantzian betetako zigorra ezingo luke berriro ere Espainian bete" adierazi dute Orozkoko frontoian egindako agerraldian.
Aramendi bezala, beste 50 euskal preso egoera berdinean daudela salatu du Sarek: "Azken urteetan pozgarriak eta esperantzagarriak diren hainbat urrats eta aldaketa ikusten ari bagara ere, oraindik salbuespenezko neurriak ezartzen zaizkie euskal presoei eta horixe da Saretik behin eta berriro salatzen ari garena".
Emakume izateagatik, gainera, Aramendik "espetxe-zigor bikoitza" jasan behar duela nabaremendu dute ere: "Emakume izateagatik, zigorra are gogorragoa da, epai judizialaz gain, espetxe sistema patriarkalaren barruko epai morala eta gizonentzat soilik prestatuta dauden espetxe azpiegiturei aurre egin behar baitie".
Mobilizazioak
Gaia salatzeko, "Bizi osorako zigorrik ez! Alaitz etxera!" lelopean, hainbat mobilizazio eta ekintza egingo dituela iragarri du Sarek gaurko agerraldian. Aiaraldeko bizilagunei dinamikan parte hartzeko deia luzatu diete gaurko agerraldian.
14 urte espetxean
2007an atxilotu zuten Aramendi, eta 2013an epaitu zuen Pariseko Auzitegiak. “Erakunde terroristako” kide izatea egotzi zioten. Renneseko espetxean igaro zuen orozkoarrak frantziako espetxealdiko azken urtea. Aurretik Roanne, Bapaume edo Fresenesen ere egon da, Orozkotik 800 kilometrotara, bataz beste.
2021eko urtarrilean, Frantziar Estatuko kondena osorik bete ostean, Espainiar Estatura eraman zute Aramendi. Entzutegi Nazionalak 2017an ezarri zion 535 urteko zigorra, 2005ean Madrileko San Blas auzoan lehergailu bat jarri izana egotzita, horrenbestez 40 urteko zigorrari egiten ari dio aurre.
Azken urtea Avilako espetxean eman du preso, Orozkotik 400 kilometrotara. Espetxe Erakundeek irailaren 29an iragarri zuten Aramendiren gerturaketa, beste 8 euskal preso politikorekin batera.