Esker mezuarekin itxi dute 2022ko Orozkorock jaialdia. Maiatzaren 20an eta 21ean izan ziren kontzertuak herrian, eta jende ugari elkartu zen zuzenekoez gozatzera. Festibala igarota, aftermoviea plazaratu du elkarteak sare sozialetan. Horrez gain, eginiko pausoaren garrantzia azpimarratu dute: "Eskerrik asko beste urte batez gurekin bidea egiteagatik. Orozkorocken bigarren edizio hau posible egiteagatik, maitasun osoz elkarlanean eraiki duguna".
"Eskerrik asko Orozkorocken bigarren edizio hau posible egiteagatik, maitasun osoz elkarlanean eraiki duguna"
Ildo beretik, "abentura honetan" murgildutako guztiei eskerrik beroenak helarazi nahi izan dizkiete. Zentzu horretan, Orozkora etorritako taldeak goraipatu dituzte, "eskerrik beroena zuei": Kurkuma, Eraso!, Sua, Viva Belgrado, The Clayton Rock Band, Toundra, Ezpalak, Niña Coyote eta Chico Tornado, Los Brazos, The Lizards eta The Andras Show.
Elkarlan handia
Antolatzaileek ekimenaren atzeko auzolan eta elkarlana ere ekarri dituzte gogora: "Eskerrik asko jaialdian lagundu duzuen boluntario guztioi. Batasuna taldeari, musika taldeenganako izan duzuen arretagatik eta Jentilzulo Kulturgunea, gure bigarren etxea izateagatik. Eskerrak eman ere soinu eta argi teknikariei. Aritz Amorrortu, Gorbeialde eta Zaloako jai batzordeko kideoi, eskerrik asko zuen babesagatik. Eta Aiaraldea komunikabideari, jaialdiari ahotsa emateagatik".
Hain zuzen, babesleen artean egon da Aiaraldea Komunikabidea ere, eta ekintzen jarraipena egin du multimedia eta kazeta formatuetan, 2019ko edizioan bezala: