Kordoban lehiatu dira Kick Boxing eta Kick Boxing Light kiroletako Espainiako Txapelketak asteburuan eta han aritu da Izaro Blanco. Orozkoarrak parte hartze azpimarragarria izan du berriro eta urrezko eta zilarrezko domina bana ekarri ditu etxera.
Emakumezkoen 70 kilogramotiko gorako kategorian lehiatu da Blanco, bai Kick Boxingean zein Kick Boxing Lightean eta bi borroka irabazi ostean, finala jokatu zuen Kick Boxing diziplinan. Eva Maria Naranjo Muay Thaiko munduko txapeldunaren ikasle baten aurka neurtu zituen indarrak eta irabaztea lortu zuen. Kick Boxing Lighten, ordea, finalean galdu zuen, borroka berdindu baten ostean.
Bere entrenatzaile eta prestatzaileak Andaluzian Iker Blanco anaia, Rafa Granados eta Eder Gomez -Kerman Lejarraga eta Nany Suarezen entrenatzailea- izan dira.
Blancok azpimarratu du, guztira, 1.500 kirolarik parte hartu dutela txapelketetan eta lehiaketa oso gogorra izan dela: "Eguraldiaren ondorioz, 38 graduko tenperatura zegoen pabilioian". Horrez gain, orozkoarrak aipatu du berarentzat hitzordu hunkigarria izan dela, bere taldekide bat proba inklusiboan aritu baita.
Borrokalariak iragarri du orain etenaldia egingo duela eta gero Muay Thain trebatzen hasiko dela, ringean debuta egiteko hurrengo denboraldian. Bestalde, gazteak aurreratu du babesleen bila hasiko direla, lehiaketetako gastuei aurre egiteko. Izan ere, azken denboraldian Europako eta Munduko txapelduna izan da orozkoarra, Montenegron eta Turkian.