Urigoitiko jaiak ospatu dituzte asteburuan, eta harrera “izugarria” izan dute, antolatzaileen esanetan. “Gainezka egin du giroak, txosnan jenerorik gabe geratzeraino. Gehiagoren bila joan behar izan gara”, aitortu diote Aiaraldea Komunikabideari, “jendea, orokorrean, oso pozik egon da, eta asko eskertu digute auzoko jaiak berreskuratu izana, urteak generamatzalako ospatu gabe”.
Larunbat arratsaldean abiatu zuten egitaraua, artzain txakurren txapelketarekin. Parrillada egon zen ondoren, eta handik gutxira hasi zen gaueko musika eskaintza, oso talde anitzekin: El Kangri & Mix Pert rapeatzaileak igo ziren lehenbizi oholtzara, mariatxien txanda izan zen jarraian, eta Aiaraldeko Soinu Sistemako kideak arduratu ziren parranda goizeko ordu txikietara arte luzatzeaz.
Biharamunean paella txapelketarekin heldu zioten egunari. "12 paella aurkeztu ziren guztira", zehaztu dute antolatzaileek. Arratsaldean, aldiz, mus txapelketa egin zuten, eta 8 bikote batu ziren norgehiagokara.
Baina umeak izan ziren eguneko protagonista nagusiak, eurentzako gaztelu puzgarriak eta tailerrak egon baitziren, besteak beste. "Igandea ere primeran atera da", nabarmendu dute jai batzordeko kideek, "eguraldia ere izan dugu lagun. Puzgarriek eta tailerrek lasaitasuna eman diete helduei, haurrak entretenituta izan dituztelako eta eurekin gozatu ahal izan dutelako jaiez".
Argazkiak: Urigoitiko Jai Batzordea