Hasi dira Orozkoko San Antolin Jaiak. Aiaraldea Komunikabideak egingo diren ekintzen genero zein hizkuntza azterketa egin du. Guztira, 46 jarduera barne hartzen ditu 2022ko egitarauak, eta horietatik 17 izango dira (%36,95) kontratatutako kultur ikuskizun edo emanaldiak.
Euskara hutsezko ekintzak %29 izango dira, eta beste %35 elebidunak. Horrenbestez, euskararen presentzia ekitaldi kontratuen %64an dago bermatuta. Gaztelera hutsezko ekintzak %24 izango dira
Eskualdeko gainontzeko herrietan bezala, genero desoreka nabaria da: kultur ikuskizunen %53 soilik gizonezkoek osatutako taldeek gauzatuko dute, %24 emakumezkoek bakarrik taularatuko duten bitartean. Ekitaldi mistoak, baina, %22 izango dira, nahiz eta ehuneko horretatik %18an gehiengoa gizonezkoa izan.
Hizkuntzari erreparatuta, euskara hutsezko ekintzak %29 dira, baina beste %35 dira elebidunak. Horrenbestez, euskararen presentzia ekitaldi kontratatuen %64an bermatua dago (%11 hizkuntza gabeko ekintzak direla kontuan hartu behar da). Beste era batera esanda, gaztelera hutsezko ekintzak %24 baino ez dira.
Zenbaketa egiteko irizpideak
Aiaraldea Komunikabideak egin du azterketa. Zenbaketa errazteko, kultura ekitaldiak soilik hartu dira kontuan (kontzertuak, ikuskizunak, antzerki emanaldiak...). Hau da, albo batera utzi dira hizkuntza zein genero irizpideen arabera sailkatzeko zailak diren zenbait jarduera (herri bazkariak, lehiaketak, ekitaldiak…).
Era berean, Orozkoko Udalak argitaratutako jai programa erabili da zenbaketa egiteko. Tokiko erakundeak eta herriko beste hainbat elkartek eta eragilek antolatutako jarduerak agertzen dira bertan, egingo diren ia guztiak, alegia (azken orduan lotutako batzuk salbu). Modu horretan, 17 ekitaldi aztertu dira guztira.
Hizkuntzari dagokionez, ondorengo multzoetan bereiztu dira jarduerak: euskara hutsezko ekintzak, gaztelerazkoak, elebidunak eta hizkuntzarik gabekoak.
Parekidetasuna neurtzerako orduan, aldiz, lau multzo osatu dira. Lehen multzoan soilik gizonez osatutako talde eta emanaldiak sartu dira. Bigarren multzoan, gizonezkoak nagusi diren kasuak barnebildu dira (%50 edo gehiago gizonezkoa). Hirugarren multzoan, aldiz, emakumeak nagusi diren emanaldiak daude (%50 edo gehiago emakumezkoak direnak). Laugarrenean, aldiz, soilik emakumez osatutako taldeak sartu dira.