Gotzon Martin txirrindulari orozkoarrak amaiera ona emango dio urte gorabeheratsuari. Izan ere, maiatzean istripu oso larria izan zuen eta, hala ere, lortu du Australiako Munduko Txapelketan parte hartzea.
Berez, Euskadi Fundazioak atzo jakinarazi zuen Espainiako hautatzaileak aukeratu duela Orozkoko kirolaria Wollongong hirian lehiatuko den txapelketan egoteko. Proba igandean hasiko da eta puntako hainbat profesional egongo dira hitzorduan, Mathieu Van der Poel, besteak beste.
"Espainiako Vueltan 21 egunez lehiatu ostean, uste dut sasoi onean helduko naizela Munduko Txapelketara", argitu du Martinek
Gotzon Martinek pozik hartu du berria: "Hau ez da egunero agertzen den aukera eta esperientzia gozatzera joango naiz". Halaber, Martinek azaldu du taldeak eskatzen diona egingo duela.
Espainiako Vueltaren ondoren, sasoian
Orozkoko kirolariak aitortu dio Aiaraldea Komunikabideari ez zela egoera onenean heldu Espainiako Vueltara, uztailean igo baitzen berriro bizikletara: "Lesioaren ondorioz, asko kostata itzuli nintzen entrenatzera eta ez nuen tartea izan lasterketa nik nahi nuen moduan prestatzeko".
Dena den, bere parte hartzea proba horretan onuragarria izan da: "21 egunez lehian aritu ostean, uste dut sasoi onean helduko naizela Munduko Txapelketara eta espero dut partaidetza polita izatea".
Hori dela medio, txirrindulariak gogo askorekin egingo dio aurre erronkari.