Orozkoko hainbat gurasok ekin diote mobilizazioak prestatzeari. Momentuz, hasieran baino ez daude, baina Guraso Elkartearen babesa dute eta Udalari ere eskatu diote Eusko Jaurlaritzarekin harremanetan jar dadin konponbide eske.
Izan ere, Jaurlaritzaren eta garraio enpresen akordio falta dela eta, Orozkoko eskolako 40 umek ez dute autobus zerbitzurik klasera joateko -hain zuzen, herriko auzunekoek- eta Laudio Institutuko dozena bat ikasle baino gehiago egoera berean daude. Institutuko kasuan, herriguneko zenbait garraio zerbitzu daude, baina gainerakoek ez dute.
Horrek ekarri du familiek eurek eraman eta jaso behar dituztela umeak egunero. Azaldu dutenez, ikasturte hasieran ez zuten deialdiak antolatzeko asmorik, uste baitzuten, iaz bezala, azken unean afera konponduko zela.
Ordea, astebete igaro da jadanik eta hezkuntza publikoan dagoen zerbitzu faltaren eragina gero eta nabariagoa da familien artean.
Orozkokoak ez dira izango eskualdean mobilizatuko diren lehen gurasoak, Aiaran eta Okondon hainbat protesta egin dituzte jadanik.