Zaloako Jaiak ospatuko dituzte asteburuan. Urteroko eskema jarraituz, aurten ere, musika eskaintza zabala eta paella txapelketa izango dira programazioko protagonistak, baina beste hainbat ekintza ere antolatu dituzte.
Hiru festa egun
Bihar, ekainak 27, piztuko dira Zaloako jaiak. Kamishibai ipuin kontalaria izango da jarduerei hasiera emateaz arduratuko dena, 19:00etatik aurrera. Ostiraleko soinu banda, aldiz, Deiedra eta Katilu musika taldeek jarriko dute. Deiedra Rebel Folk bandak Irlandako eta Eskoziako doinuak ekarriko ditu auzora, "Zaloako plaza irlandar pub bilakatzeko". Katilu Arrigorriagako hirukoteak 2022an bisitatu zituen Zaloako jaiak lehenengo aldiz, eta aurten ere Blues-Rock musikarekin beteko du auzo orozkoarra.
Larunbata izango da asteburuko egun nagusia. Meza ostean herri kirol erakustaldia eskainiko du Arrigorriagako Jasoka taldeak, eta ordu horretan hasiera emango diote ere paella txapelketaren edizio berriari. Txapelketako parte hartzaileek 14:30ean aurkeztu beharko dituzte paellak. Arratsaldea freskatzeko garagardo dastaketa egingo dute 19:00etan, eta 21:00etan kontzertuei bide emango diete.
Hiru talde igoko dira Zaloako oholtza gainera: Barrrk, Painapple eta La Txirla Records. Barrrk bandak Walking About EPa plazaratu berritan igoko da Zaloako eszenatokira, Orozko Rocken utzitako zapore ona errepikatzeko asmoz. Painapple taldeak, pop-punk doinuak ardatz, iazko azaroan kaleratutako Bitter lana aurkeztuko du zuzenean. Azkenik, urte luzeko etenean salbuspena eginda, La Txirla Records taldeak La Polla Records banda ezagunari omenaldia eskainiko dio.
Igandean agurtuko dituzte Zaloako Jaiak. Bizilagunak bertsolarien, porra txapelketaren eta pintxo-janaren inguruan elkartuko dira 13:00etatik aurrera, festak azken unera arte zukutzeko.