Eguraldi bikainak eta giro apartak lagunduta ospatu da aurtengo Zaloako jaien X. urteurrena. Hiru egunez, auzotarrek eta bisitariek adin guztietarako prestatutako ekintzez gozatzeko aukera izan dute, musika, gastronomia, kirola eta tradizioa uztartuz. Hamargarren urteurrena ospatzeko prestatu den egitarau zabalak berriro ere agerian utzi du Zaloako jaiek duten indarra eta herritarren parte-hartze handia.
Ostiralean, jai hasierako ekitaldiek eman zieten hasiera ospakizunei. Gauean, Adar eta Moonshine Wagon taldeen kontzertuek giro paregabea sortu zuten.
Larunbatean, meza eta pintxoen ostean, paella txapelketa egin zen, eta guztira 21 paella aurkeztu ziren, parte-hartzaileek beren sukaldaritza trebetasunak erakutsiz. Eguerdian, Jasoka Herri Kirolak taldearen erakustaldiaz gozatzeko aukera egon zen, eta arratsaldean Kalakako jolas tradizionalek eta tailerrek txikien zein helduen gozamenerako tartea eskaini zuten. Iluntzean, garagardo dastaketak eta kontzertuek giro hobezina jarri zuten, The Ganorabakos, Gautegun eta DJ Arriagaren emanaldiekin. Nahiz eta euri zaparrada ederra bota, jai giroak ez zuen etenik izan, eta parte-hartzaileek gogotsu jarraitu zuten egitarauarekin.
Domekan, pintxoek eta bertsolariek hartu zuten lekukoa. Ondoren, porra txapelketa egin zen, eta jai giro ederrean eman zitzaien amaiera aurtengo Zaloako jaien X. urteurreneko ospakizunei.
Argazkiak: Zaloako Jai Batzordea