Biguri mintzatu da lehenbizi. Duela zortzi urte hiriak bizi zuen egoera izan du hizpide. “EAJk klientelismo sare bat ehundu zuen Urduñan”, gogorarazi du, “hiria erabat zorpetu zuten”. Aurrekontuan zehaztutakoa baino askoz gehiago ordaintzen amaitu zuten proiektuak jarri ditu horren adibide gisa: “Aduana, jubilatuen etxean altzariak jartzea, golf zelaia...”. EH Bilduko alkategaiaren ustez, udala “leku itxi bat” zen garai horretan, oxigenorik gabekoa. “Gobernura iritsi ginenean, gainera, konturatu ginen arazoa uste genuena baino larriagoa zela”.
Gauzak hala, lehen agintaldian udaleko “armiarma sareak garbitzen” eman zutela azaldu du Bigurik. Bigarren agintaldian, aldiz, Urduñari “bizitza” eman diotela aldarrikatu du: “frogatu dugu gauzak beste modu batera egin daitezkeela. Aukera eta beharretan zentratu gara lege-agintaldi honetan”. Hautagaiak aitortu du ez dituztela nahi izan dituzten gauza guztiak egin, “baina 180 graduko bira eman dugu eta orain etorkizunerako norabidean goaz”.
Zentzu horretan, EH Bilduko kideak aurreratu du iragan hauteskundeetan aurkeztu zuten programa bera izango dutela iparrorratz oraingoan ere, udalerriari “bere potentzialtasun guztia” ateratzeko, “Urduñan bizi garen pertsonak garelako hiriaren birika”.
Oscar Matuteren hitzartzea
Oscar Matutek hartu du hitza jarraian. Apirilaren 28ko hauteskundeetan bozkatzearen garrantzia nabarmendu du diputatuak, “bertan lortutako emaitzek eragina izan dezaketelako maiatzeko udal hauteskundeetan”. Era berean, ERC eta EH Bilduren arteko aliantza goraipatu du Matutek, “aliantza horren pisua klabea izan daitekeelako Espainiako Gobernua osatu beharko denean”.