EAJ: "Talde lana izango da Urduña haziaraztera eramango gaituena"

Iñaki Cuadra EAJko zerrendaburuak eta Idoia Sagastizabal Espainiako Kongresuko ordezkari jeltzaleak hartu dute parte ekitaldian. 

Foru plazan egin du hauteskundeetako ekitaldia Urduñako EAJk. Iñaki Cuadra izan da hitza hartzen lehena, Urduñarako jeltzaleen erronkak aipatuta. Azpiegiturak, enplegua eta industriagunea indartzeko beharra edota gazteria kontseilua sortzeko konpromisoa izan ditu hizpide, besteak beste. “Urduña izan zena errekuperatu behar dugu, hiri bizia dugu, eta hori hala bada kulturak batzen gaituelako da”. Kulturarekin jarraituz, Andra Mari ikastetxearekin hitzarmena sinatzeko ideia azaldu du, "arte eszenikoak eskaini ahal izateko bertan, eta Amurriora horretara joan behar ez izateko”. Obren harira, gobernu taldearen inbertsio eza kritikatu du alkategaiak: “Urduña erortzen ari da, auzoak, Foru plaza... dauden arazoei soluzioak emateko ez dugu aukerarik ikusten”. Enpleguari dagokionez, industriagunean enpresa berri bat kokatuko deal aipatu du. “4.0 industria bultzatu behar dugu, ekintzaileek euren jarduera Urduñan gara dezaten. Industria, enplegua, komertzioa eta turismoa sustatzea funtsezkoa da”, erantsi du.

Kirol proiektuetan igerilekuak eta aisialdi gunea berritzeko hautua defendatu du Cuadrak, jeltzaleen egitasmoaren berri emanez:  “Proiektua dugu, berritu behar da azpiegitura. Enpresekin hitz egin dugu eta uste dugu epe motzean igerileku publiko-pribatua egin litekeela”. Finean, Urduña balioan jarri nahi du EAJk, “aprobetxatu gabeko hanka asko ditu eta”. Hiria hobetzeko talde-lanean jardungo dute, azpimarratu duenez: “Diputazioarekin elkartuko gara. Denekin egon eta hitz egin nahi dugu. Programa horrela egin dugu, gazterian 70-80 lagunek hartu dute parte, bileretan jende asko elkartu da... Talde askoren lana da hau guztia errealitate izatea. Talde lana izango da Urduña haziaraztera eramango gaituena”. 

Idoia Sagastizabal EAJren Espainiako kongresuko ordezkaria igo da oholtzara ondoren. “Eraikitzeko politika egin dugu oposiziotik, baina orain udaletxea lideratzea dagokigu”, adierazi du, "ekintzek erakusten dute eredu politiko eta ekonomikoa garela hemen eta Europan”. EAJ taldea konprometitua eta ilusioduna dela goraipatuz bukatu du hitzartzea, hirirako dituzten proiektuak gogora ekarrita: "10 urte eta gero enpresa handi bat erakartzea lortu dugu gure hautagaiaren lanari esker. Pankarta atzeko politika edo politika eraikitzailea, hori erabaki beharko dute herritarrek maiatzaren 26an".

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide