Azken astean Renfek ematen duen aldiriko zerbitzuak aldaketa ugari izan ditu eta 30 tren baino gehiago eten dira. Zehazki, iragarritakoak baino zerbitzu gehiago geratu dira gaur bertan behera, erabiltzaileek azaldu dutenez. Hori justifikatzeko enpresak "arazo teknikoak" argudiatu baditu ere, sindikatuek bestelako iritzia dute.
Atzo langile batzordeak bilera egin ostean, oharra plazaratu zuen aldarrikatzeko behargin gehiago kontratatzea ezinbestekoa dela. Sindikatuek gogoratu dute hainbat erretiro gertatu direla Renfen eta lanpostu horiek ez direla ordezkatu jende berriarekin. Halaber, kritikatu dute Bilboko zerbitzuan utzikeria dagoela bezeroen arretari dagokionez.
Gainera, beharginen ordezkariek nabarmendu dute bezeroen beharrak asetzeko egon beharko liratekeen langile asko administrazio eginkizunak betetzera bideratu dituela gerentziak: "Langile kopuruaren gabezia hori segurtasun arazoak sortzen ari da, bai geltokietan zein trenetan".
Horri lotuta, beste salaketa larri bat egin dute sindikatuek. Izan ere, lankide nahikorik ez dutenez, antza, tren gidariek maiz bakarrik egin behar diete aurrei matxurei eta gertakariei.
Lan deialdi publikoa
Hori guztia konpontzeko, Enpresa Batzordeak konponbide bakarra ikusten du: enplegu publikorako eskaintza egitea eta dauden hutsuneak ganoraz betetzea.
