Xabier eta Javi Irabien aita-semeek elkartasun ekimen berria egingo dute asteburuan. Urduña aukeratu dute horretarako, eta 'Pausoz pauso' izena jarri diote erronkari. Hain zuzen, 12 orduz ariko dira ibilian 10 kilometroko zirkuitu bat egiten hirian barrena.
"Ibilbidea adin guztiei irekia egongo da", zehaztu dute diru bilketarako aktibatu duten atariko gunean. Besteak beste, bertan ere gauzatu ahalko da ekarpen ekonomikoa, 1.000 euro lortzeko.
Foru plazatik igaroko dira 2.5 orduro gutxi gorabehera, eta umeentzat jolasak, musika erakustaldiak eta txosna egongo dira 8:00etatik 20:00etara
8:00etan hasiko dira oinez, eta 20:00etan bukatuko dute, dena ondo bidean. Eurekin joatera animatzen direnek 10 euroko dohaitza egin beharko dute, "eta opari bat jasoko dute". Gainera, egun osoko animazioa prestatuko dute Foru plazan: Kalaka egur jolasak, Urduñako Erauntsi dantza taldea eta Olaranekoen txosna, txalaparta eta txistularien erakustaldia...
Ibilbideari dagokionez, ondorengoa izango da: Foru plazatik hasiko dute zirkuitua bi ordu eta erdiro, Arbieto igarota pista partzelarietatik joango dira Artomañara, berriro plazara itzultzeko. Izan ere, Artomañan bizi da Hodei, ataxia telangiectasia eritasuna duen Euskal Autonomia Erkidegoko bost kideetako bat.
Ez da Javi eta Xabierrek burututako elkartasun ekimen bakarra. Izan ere, 2021.urtean Santiagoko bidea osatu zuten tandemean Spiderabelekin, '120km AEFATen alde' lemapean. Helburuaz galdetuta, gaixotasunari ikusgarritasuna ematea eta ikerkuntza sustatzea dutela jomuga azpimarratu dute. 2020. urtean, aldiz, Urduñatik Finisterrera joan ziren Irabien sendiko hiru belaunaldi.
