Atzo aurkeztu zuten Urduñan Hiri Antolamendurako Plan Orokor berriaren aurrerakina. Bost ardatzen inguruan egituratu dute egitasmoa: espazio libreen sarea osatu eta lotzea, hiri-lurzorua birdentsifikatzea eta hutsuneak betetzea, korridore berdea edo ekologikoa errespetatzea eta turismo jasangarria sustatzea kanpin berri bat sortzea.
Helburu horiek jarraiki, planak hiru aukera eskaini dizkie herritarrei:
1. aukera
Hiri-perimetroan baino ez da aurreikusten eragitea, ez da toki gehiago urbanizatzea aurreikusi. Aukera horretan ez da barne biltzen uholde-arriskuak eragindako lurzorurik, eta hiri-espazio hutsak betetzen dira. Aukera honek 294 etxebizitza ditu.
2. aukera
Orain arteko hiri-perimetroarekin jarraitzeaz gain, bigarren alternatiban hiru sektore urbanizagarri proposatu dituzte: Kintana Erreka, La Rondina II eta La Paul poligonoa.
Hirigunean hutsik dauden espazioak betetzea ere iradoki dute. Proposamen honek 358 etxebizitza ditu.
3. aukera
Kasu honetan ere hiri-lurzoruari eutsi zaio, eta sektore urbanizagarriak honako hauek izango lirateke: Tras Santiago eta La Martuja Berria bizitegi-sektoreak. Aldiz, La Paul industrialdean eta Floridan jarduera ekonomikoak jaso dituzte. Etxebizitzen kopurua ere 358 da.
4. aukera, alboratuta
Hasieran bazegoen beste proposamen bat: egungo HAPOrekin jarraitzea. Baina ikusita uholde eremu gehiago zeudela horren barruan, baztertu dute idea.
Prozesu parte-hartzailea
Aurkezpenaren ondoren, prozesu parte-hartzailea abiatuko du Urduñako Udalak.
Martxoaren 11tik aurrera HAPOaren idazleekin aurretiazko hitzorduak zein hitzordu telematikoak izateko aukera izango dute herritarrek, hurrengo bi hilabeteetan.
Hitzordua hartzeko 945 383 003 EXT 19 telefono zenbakira deitu edo hirigintza@urduna.com helbidera idatzi ahalko da.
Iradokizunak idatziz erregistratu ahalko dira Zaharra 2-4k bulegoetan edota instantzia telematikoz.