Renfeko tren zerbitzua hainbat albisteren ardatz izaten ari da azkenaldian. Izan ere, Eusko Jaurlaritzak eta Espainiako Gobernuak adostu dute jadanik aldirikoen kudeaketa EAEko erakundearen esku uztea.
Horrekin batera, Espainiako Gobernuak adierazi du bere asmoa dela 500 tren berri erostea.
Erosketa horren data ez dute zehaztu, ezta unitateak nora joango diren ere. Horregatik, Maria Luisa Goikoetxea eta Itziar Moleres urduñarrek deia zabaldu dute erreklamazioak egiteko, egungo zerbitzua ez baita irisgarria. Gogoratu beharra dago Goikoetxeak aulki gurpilduna erabili behar duela eta Moleresen alabak ere mugikortasun arazoak dituela gaixotasun arraro baten ondorioz.
Gauzak horrela, euren aldarrikapen ekimenarekin azaleratu nahi dute Renfeko C-3 zerbitzuan irisgarritasun araudia ez dela betetzen eta tren berriak behar direla.
C-3 lineako tren berriak, Madrilgo eta Bartzelonako tren zaharrak
Aiaraldea Komunikabidea Renfe enpresako iturri sindikalekin mintzatu da balizko tren berri horiei buruz eta erantzuna izan da ez dakitela ezer, ez eskualdera helduko diren, ezta noiz egongo diren funtzionamenduan ere. Halaber, gogoratu dute orain arte C-3 linean jasotako tren "berriak" Bartzelona eta Madrilen kendu dituztenak izan direla, hara unitate berriak heltzean. Horrek esan nahi du C-3 lineara heltzen direnean, jadanik hamar edo hamabots urtez egon direla lanean hiriburu handi horietan.
Hain zuzen, hori da arazo teknikoak eragiten duen aldagaietako bat: makina zaharrak direnez, maiz ez dago piezarik merkatuan matxurak konpontzeko.