Lan Ikuskaritzak errunduntzat jo du Amiantec 3000 enpresa Mohamed Lazraquen heriotzagatik. Urduñako bizilaguna Amurrioko enpresa horrentzat lanean ari zen iragan urrian, amiantoa kentzen, Loiuko GECSA Conductores y Conexiones Especiales S.A. enpresako sabaitik erori zenean. Ikuskaritzak ondorioztatu du 8,5 metroko altueratik erori zela, eta ez dirudiela inora lotuta zegoenik, segurtasun arnesa soinean zeraman arren.
Ikuskaritzak ondorioztatu du Mohamed Lazraq 8,5 metroko altueratik erori zela, eta ez dirudiela inora lotuta zegoenik.
Txostena berez ez da publiko egin oraindik, baina Vocento taldeak eman du bertako edukiaren berri. Aiaraldea Komunikabidea Osalanekin jarri da harremanetan eta erakunde horretako kideek baieztatu diote dokumentua amaituta dagoela eta enpresari helarazi zaiola, baina ez dakitela nola filtratu den. LAB sindikatuak, bere aldetik, komunikabideari jakinarazi dio ez dutela oraindik inolako informaziorik jaso, nahiz eta hilabeteak daramatzaten txostena eskatzen.
Dena dela, Vocentok zabaldutako informazioaren arabera, txostenak ondorioztatzen du harremana dagoela lan heriotzaren eta enpresak lan arriskuen prebentzioan dituen gabezien artean. Besteak beste, ikuskariak ondorioztatu du sabaiko bizi-lerro finkoak kendu zituztela eta ez zirela horren ordezkoak jarri, planak hala zehazten zuen arren. Ondorioz, langileak homologatu gabeko soka batera edo sabaiko estruktura metalikora lotzen ziren eta, lehen esan bezala, ikuskariak ondorioztatu du hildako behargina ez zegoela inora lotuta istripua gertatu zen unean. Zehazten duenez, Mohamed Lazraquen lankideak behean zeuden urduñarra erori zenean, eta baita prebentzio arduraduna ere.
LAB sindikatuak hilabeteak daramatza txostena eskatzen, baina oraindik ez du jaso.
Ikuskariaren dokumentuak langileen, obran inplikatutako prebentzio arduradunen eta Osalanen teknikarien adierazpenak hartzen ditu. Ateratako ondorioak medio, zigor-espedientea abiatu du ikuskaritzak. Ikusteke dago, beraz, zer segida izango duen auziak.
Kasu gehiago
Mohamed Lazraquena ez zen kasu isolatua izan. Aiaraldea Komunikabideak Amiantec 3000ko hainbat langile ohirekin hitz egin zuen lan heriotza gertatu berritan, eta antzeko gauzak kontatu zituzten guztiek Amurrioko enpresako lan baldintzen inguruan. Amiantoa kentzeko segurtasun neurri egokien gabezia, arnesak iraungita egotea edota formazio falta salatu zuten, besteak beste: “Bagenekien azkenean norbait hil egingo zela, gutako edonor izan zitekeen”.
