Urduña Herri Eskolako Goraso Elkarteak deialdia zabaldu du, ikastetxearen inaugurazioaren 30. urteurrena ospatuko baitute datorren ostiralean. 17:30ean izango da ekitaldia hezkuntza zentroko gimnasioan eta aukera baliatuko dute iraganera zein etorkizunera begira jartzeko.
Berez, ekitaldian solasaldia, argazki eta bideo zaharren proiekzioa, lekukotzak, logotipo berriaren aurkezpena, mokadua eta kalejira egingo dituzte.
Izan ere, honakoa aldarrikatu dute: "Urduñako familia talde batek amets ausarta izan zuen: euskarazkoa, laikoa eta publikoa izango zen eskola bat sortzea. Ilusioz eta konpromisoz, komunitate osoaren indarrez, herriaren balioak eta nortasuna islatzen zituen proiektua martxan jarri zuten".
Eskola komunitatearen aburuz, hezkuntza proiektu hutsa izatetik herria batzeko elementua izatera igaro da zentroa. Hori dela eta, uste dute ikastetxeak egindako bidea eta ikasleen, gurasoen eta irakasleen ahalegina aitortu beharra dagoela.
Etorkizunari begirako aldarrikapenak
Halaber, ekitaldiaren antolatzaileek ez dute aurrera begirako erronkarik baztertu eta Urduña Herri Eskolan inbertitu eta hobekuntzak egiteko premia azpimarratu dute: "Orain 30 urte inauguratu genuen eraikina berritu beharra dago. Izan ere, hezkuntza erronka berriei aurre egiteko askotariko espazioak, inklusiboak eta aktiboak behar ditugu. Gainera, eraikina gehienezko edukierara iristen ari da; espazioa handitu beharra dago. Horrekin batera, jangela ereduarekin aurrera jarraitzeko, sukalde propioa behar dugu, baita espazioaren berregituraketa ere. Horregatik, funtsezkoa da erakunde publikoek ardura hartzea eta ikas-komunitate osoaren ongizatea, ikaskuntza eta parte-hartzea sustatuko duten azpiegiturak bermatzea. Hezkuntza da etorkizunaren giltza, eta giltza hori gure herriaren esku dago".
Ez da aurten Urduña Herri Eskolak hartu duen erronka bakarra, Euskal Eskola Publikoaren jaia ere antolatu baitzuten ekainean.