Moja klaratarren auziaren soka luzeak ez du amaierarik. Gaur Burgoseko Guardia Zibila, zerbitzu medikuak eta Bilboko epaile bat bertaratu dira Urduñako komentura. Epaileak berak eskatu du institutu armatuaren presentzia. Izan ere, helburua da moja nagusienei azterketa medikua egitea.
Guardia Zibilak Aiaraldea Komunikabideari adierazi dionez, epailearen susmoa da moja helduenek ez dituztela dagokizkien zaintzak jasotzen eta komentuan ez direla betetzen bizi baldintza egokiak eurentzat.
Guztira bost emakume eraman dituzte Basurtuko ospitalera, komentuko mojek eta Guardia Zibilak baieztatu dutenez. 101 eta 88 urte bitarteko mojak dira ospitaleratuak.
Guardia Zibilaren prentsa kabineteak aipatu duenez, susmoak egiaztatzen badira, litekeena da beste komentu batera bidaltzea. Iritzi berdina adierazi dute Urduñan geratu diren mojek ere.
Atsekabetuta egin dituzte medioen aurrean adierazpenak mojek. "Bakarrik" utzi dituztela adierazi dute, eta euren asmo bakarra "askatasunean" bizitzea da, fede katolikoa oinarri, "azken bi mila urteetan bezala".
Gogoratu beharra dago gaurkoa ez dela komentuan azkenaldian egin duten lehen esku hartzea. Hain zuzen, Guardia Zibilak bi moja atxilotu zituen duela aste gutxi, arte trafikoa leporatuta. Polemika guztia duela urtebete hasi zen, klaratarrek Eliza Katolikoa utzi zutenean.
Argazkiak: Aimar Gutierrez Bidarte