Urduña zinema plato bihurtzearen ondorioen inguruan mintzatu zen Iker Santocildes Aiaraldea Komunikabidearen Azalera podcastean. Horrelako grabaketek Urduñan duten eragin ekonomiko positiboa nabarmendu zuen alkateak, eta zifrak ere jarri zituen mahai gainean: "Grabaketa batek 2-3 hilabete irauten baditu agian 300.000 euroko eragin zuzena du Urduñan, jatetxeetan, ostalaritzan eta inguruko zerbitzuetan. Asko da". Gauzak hala, horrelako ekimenek "tokiko ekonomia indartzen dutela" uste du Santocildesek.
Grabaketek hiriaren egunerokoan duten eraginaz galdetuta, gobernuburuak ziurtatu zuen Urduñan 13-14 grabaketa egon direla orain arte, eta horietako bostpasei baino ez direla kalean egin. Izan ere, pelikuletako askok Mariaren Lagundiaren Ikastetxeko azpiegiturak baliatzen dituzte eta horrek asko errazten du elkarbizitza, "herritarren egunerokoan ia eraginik ez dutelako".
Hain zuzen, Mariaren Lagundiaren Ikastean eraikiko dute Bilbao Bizkaia ikus-entzunezko huba, 4,6 milioi euroko inbertsioa eginda. Azpiegitura berri hori datorren urterako martxan egotea aurreikusten dute, eta horrek are grabaketa gehiago erakarriko dituela espero dute.