Ezustea gertatu da gaur 9:00etan Aiarako udal osoko bilkuran. Izan ere, maiatzaren 28an Gentza Alamillo jeltzalearen zerrenda izan zen garaile, bost zinegotzi eskuratuta. Edonola ere, Aiara Batuz bigarren indarra izan zen eta hiru ordezkari lortu zituen. Horiek EH Bildukoekin batuta, beste hiru, koalizioko gobernua sortzeko aukera eskaintzen zuten hauteskundeen emaitzek.
Dena den, Aiara Batuz eta EH Bilduren arteko negoziazioak ez dira izan emankorrak eta bazirudien zerrendarik bozkatuena gailenduko zela, hau da, EAJrena.
Udalbatzan bertan ez da egon aurkako adierazlerik, hasi bezain pronto Aiara Batuzek berak iragarri baitu bere alkategaia aurkeztuko zuela.
Hala ere, bozkatzerako orduan, Pruden Otegiri eman dizkiote bozak eta sorpresa adierazpenak entzun dira Aiarako Udaletxeko aretoan.
Harrituena, agian, Pruden Otegi bera izan da, berehala jarri beharko baita lanean erabakitzeko zein gobernu eredu garatuko duen EH Bilduk.
Aiara Batuzek izan du giltza
Aginte makila EH Bilduri eman ostean, Aiara Batuzeko bozeramaileak, Iratxe Parrok, argitu du zergatik hartu duten bide hori. Parrok gogoratu ditu EH Bilduk erabilitako zenbait lelo hauteskunde kanpainan, eta adierazi du espero dutela koalizioak asmo eta irizpide horiek mantentzea.
Halaber, aipatu du maiatzaren 28an aiararrek aldaketa nahia erakutsi zutela eta hori ahalbidetu duela Aiara Batuzek, herritarren nahia jarraiki.
Gentza Alamillo
Hauteskundeek utzitako alkategai bozkatuenak normaltasun osoz hartu du Aiara Batuzen erabakia. EAJ bozkatu zutenei eskerrak eman dizkie eta azpimarratu du bere alderdiak Aiara eramaten duela bihotzean.
Pruden Otegi
Ezustean izan bada ere (maiatzeko hauteskundeetan EH Bildu hirugarren indar politiko bozkatuena izan zen), aginte makila Pruden Otegiri egokitu zaio eta ez du ezkutatu sorpresa izan dela. Hala ere, beste taldeekin elkarlanean aritzeko prestutasuna azaldu du.