Eguzkik gogoratu du uztailaren 21ean Aretan eta Laudion hainbat arrain agertu zirela hilik eta URA agentziak oxigeno faltari egotzi ziola gertakaria.
Hala ere, erakunde ekologistak adierazi du: "Urak ez du esaten oxigeno murrizketa nagusiki Nerbioi Garaia osoan ibaira egiten diren isurketengatik dela, ur zikinak biltzeko azpiegitura eta kolektoreak falta baitira eta noski, baita Basaurbe eta Markijanan eraiki beharreko araztegiak ere".
Zentzu horretan, ekologistek kritikatu dute ibaiak arazteko azpiegituren egoera: "Saneamendu lanak oso-oso atzeratuta daude (20 urte kasu batzuetan), azpiegitura batzuk zaharkituak geratzen ari dira, kontrol falta dago, administrazioaren naiz enpresen aldetik utzikeria… Beraz, arrazoiak baita arduradunak ere ugariak dira (lantegiak, Eusko Jaurlaritza, URA, Espainiako Ingurumen Ministerioa…) baina garbi geratzen dena da, gure ibaiak direla kaltetu zuzenak, ingurumena dela galtzailea eta ondorioz baita gure bizi kalitatea ere".
Hori dela medio, Eguzkik honakoa eskatu du:
*Administrazio edo/eta erakunde arduradunei (Eusko Jaurlaritza, URA, Espainiako Ingurumen Ministerioa, Aldundiak, Ur Partzuergoak) dagozkien inbertsioak abiatzea.
*Dauden azpiegituren zaintza eta mantenu egokia egitea.
*Erabateko gardentasuna bermatzea, informaziorik ez ezkutatzea herritarrek eskubidea dutelako eta sentsibilizatzeko balio dezakeelako.