Espainiako Sustapen Ministroa den Iñigo de la Sernarekin bildu ziren atzo Aretako geltokian iaz hildako gaztearen gurasoak. Madrilera joan ziren horretarako.
“Ez ginen pozik atera bileratik, baina uste baino hobeto egon zen”. Hala adierazi du zendutako gaztearen aita den Gonzalo Faustmannek. “Adi entzun zuten esan genuena eta oharrak hartu zituzten. Bazirudien serioski hartu zutela gaia”.
Ministroaz gain, gobernuko beste goi-kargudun batzuk egon ziren batzarrean, Azpiegituren Idazkari Orokorra eta Renferen Operazioen Zuzendari Orokorra tartean.
Bi konpromiso
Fautsmannek azaldu du ministroak bi konpromiso hartu zituela. Lehena: Bidaiarien asegurua indarrean egotea bidai-txartela aktibatzen denetik baliogabetzen den arte. “2017ko urtarrilaren 1ean jarri zuten abian neurri hori. Baina, adierazi zigutenez, gure alabaren kasuan ez luke balioko”.
Trenbideen gaineko pasabideen ingurukoa da agintariek hartutako bigarren konpromisoa. “Pasabide horiek guztiak aztertuko dituzte”, jakinarazi du Fautsmannek, “hala ere, 2-3 urte beharko dituzte ikerketa hori egiteko. Horregatik eskatu diogu ministroari behin-behineko segurtasun neurriak aplikatzea pasabideak aztertzen joan ahala”.
Hildako bidaiarien senideei ematen zaien arretaz ere mintzatu ziren bileran. “Adierazi ziguten tren barruan gertatzen diren ezbeharretan soilik ematen dela zerbitzu hori, baina gaia ikertuko dutela gaineratu zuten”. Fautsmannen aburuz, ondo dago horrelako azterketak egitea, betiere gero aplikazio praktiko bat baldin badute.
Trenak igarotzen direnean entzuten den abisuaz ere eztabaidatu zuten. Renfeko ordezkariek adierazi zuten ohartarazpen hori trena igaro baino minutu erdi edo minutu bat lehenago entzuten dela. “Guk adierazi genien arautegia aldatu egin beharko dela orduan, iritsi berri den tren baten barruan dauden bidaiariek ezin dutelako abisu hori entzun”.
300.000 sinadura baino gehiago
Hildako gaztearen gurasoak ez ziren bakarrik joan Madrilera, azken bi hilabeteetan jaso dituzten 318.341 sinadurak eraman zituzten eurekin eta ministerioko erregistroan utzi zituzten. Hori eginda, gobernuak hartutako konpromisoen zain geratu dira.
Trenbideen gaineko pasabide guztiak aztertzera konprometitu da Espainiako Sustapen Ministroa
Aretan hildako gaztearen gurasoekin eginiko bileran hartu zuen ministroak konpromiso hori. Senideek adierazi dute batzarra “uste baino hobeto” egon zela.
Erlazionatuak
LAGUN AGURGARRIA:
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide