Irakurketa bateratua plazaratu dute LABek, STATek eta USOk gaur Tubacexen egingo den lan-hitzarmen proposamenaren bozketa dela eta. Berez, gezurretan aritzea leporatu diete ELA, CCOO eta Independenteei.
Nabarmendu dutenez, hiru sindikatu horiek aurkeztutako lan-hitzarmen proposamenak ez dakar inolako hobekuntzarik langileentzako. “Uneoro utzi dugu argi gure estrategia langile guztientzako hitzarmena lortzea dela, ez batzuk guztien kontura poltsikoak betetzea”.
Hitz gogorrak baliatu dituzte LAB, STAT eta USOk beste hiru sindikatuen aurka: “Esan ahalko zenigukete langile guztioi noiz eta non negoziatu duzuen lan-hitzarmen hau? Inguruko jatetxeetan bazkaltzen?”.
Langileen erdia “negoziazioetatik alboratzea” egotzi diete irakurketan, hobekuntza gisa aurkeztu dituzten puntuak hala ez direla azpimarratzearekin batera. “Ez dute hobekuntzarik lortu, ez dira ahalegindu ere egin”.
Aurreko lan-hitzarmena ere izan dute hizpide: “Zuek baino ez zenuten hitzarmen hori sinatu, eta langile guztiak ari gara akordio horren ondorioak sufritzen, eskubide sozial eta ekonomikoen galera argi batekin”. Horregatik, “patronalaren eskutik” joatea leporatu diete ELA, CCOO eta Independenteei, “langileentzat inolako onurarik lortu gabe”.
"Koakzioak"
Era berean, lantegietan azken asteetan jazotako gertaerak salatu dituzte LABek, STATek eta USOk. “Lotsagarria da nola behartu dituzten fabrikako arduradunak, hauek langileak modu autoritario eta kasu batzuetan diktatorialean presionatu zitzaten, modu horretan beldurra izan eta baiezko botoa eman dezaten”.
Zuzendaritzaren jarrera ere kritikatu dute hiru sindikatuek, langileei bidalitako gutun pertsonalizatuak gogora ekarriz, besteak beste.
Horregatik guztiagatik, gaur “inolako beldur eta koakziorik gabe” bozkatzeko deia luzatu diete langileei, botoa “sekretua eta pertsonala” dela gogorarazita.
