Igandean koronabirusaren 5 positibo berri erregistratu zituen Osakidetzak Aiaraldean. Zehazki, 3 Laudion izan ziren eta udalerri hori 92 kasura heldu da. Amurriok 2 gehitu zituen bere kopurura eta jadanik 68 dira gaixoak bertan.
Orain arteko kutsatuen baturak 240 positibo utzi ditu eskualdean. Aipatutakoak ez ezik, 25 identifikatu dituzte Urduñan, 23 Aiaran, 17 Orozkon, 9 Artziniegan eta 6 Okondon. Guztira, 240.
Atzoko datuak apirilaren 2tik aurrera jazo diren ohiko kopuruen mugetan geratu dira. Izan ere, apirilaren 2an 20 kasu berri detektatu zituen EAEko osasun sistema publikoak. Geroztik, apirilaren 4an 6 positibo egon ziren, apirilaren 7an 8 eta larunbatean 10. Larunbatean topatutako erdiak Urduñako nagusien egoitzakoak izan ziren. Gainerako 14 egunetan egunero ez dira 5 herritar baino gehiago kutsatu, eta 4 egunetan gaixo berri bakarra egon da.
Beraz, pandemiaren unerik okerrenetatik -martxoko azken eguneak- urrun daude azkenengo estatistikak. Azken astean 25 lagun besterik ez dira gaixotu, Osakidetzaren arabera. Hau da, %10,41.
Laudio EAEko 24. udalerririk kutsatuena bada ere, populazioari erreparatuta, herri kaltetuen zerrenda hurrengoa da Aiaraldean; Aiara %0,79a, Orozko %0,65a, Amurrio %0,64, Urduña %0,58a, Laudio %0,50a, Okondo %0,49a eta Artziniega %0,46a. Arakaldon eta Arrankudiaga-Zollon, ofizialki, Osakidetzak ez du positiborik topatu.
EAEri dagokionez, atzo 53 kasu besterik ez ziren egon. Hau da, erkidego osoko kasu diagnosi berrien %9,43a Aiaraldean izan zen, %5,66a Laudion eta %3,77a Amurrion. Guztira, Bizkaian 7.045 gaixo, Araban 3.241 eta Gipuzkoan 2.342 detektatu dira. Hildakoak 1.081 dira, atzo baino 19 gehiago.
