Atzo ere Osakidetzak ez zuen diagnostikatu Covid-19ko kutsatu berririk Aiaraldean. Aste gorabeheratsuaren urrezko itxiera izan da, bi egunez jarraian ez baita gaixo gehiago agertu. Hala ere, guztira 349 lagun izan dira birusa izan dutenak, atzo arte.
Bukatu berri den asteak datu baikorrak utzi ditu osasun sistema publikoan: astelehenean ez zuten positibo berririk topatu. Ordea, asteartean eta azkenean marka guztiak hautsi ziren: Apirilaren 28an 51 kutsatu identifikatu zituzten eta asteazkenean, aldiz, 26.
Roberto Gonzalez Santisteban Aiaran lan egiten duen medikuak berehala argitu zituen kasu berri horiek: positibo zaharrak zirela kasu ia guztietan. Izan ere, Osakidetzak herritar zaurgarrien artean egin zituen analisiak, eta gehienek gaindituta zuten koronabirusa.
Gauzak horrela, ostegunean eta ostiralean aurreko asteko kopuruetara itzuli ziren gaixo berriak, eta 6 eri detektatu zituzten egun bakoitzean. Edonola ere, asteburuan ez du gaixo berririk diagnosikatu Osakidetzak.
Esan bezala, aste gorabeheratsua izan da; eta 89 kasu gehiago agertuta ere -eskualdeko kutsatu guztien %25,5a- zenbaketa baikorrekin amaitu da astea. Guztira, Laudiok 123 kasu dauzka, Amurriok 99, Aiarak 61, Urduñak 29, Orozkok 19, Artziniegak 12 eta Okondok 6.
EAEn test gutxiago egin zituzten atzo, 2.000 azpitik, eta positiboak 49 izan ziren. Gauzak hala, atzo Covid-19ak kutsatutako 12 lagun gehiago hil ziren eta jadanik 1.341 hil dira erkidegoan. Gainera, 6 herritar gehiago ospitaleratu zituzten, 530era heldu arte, eta 3k ZIU utzi zuten. Bizkaian 9.251 kasu diagnostikatu dituzte, Araban 4.217 eta Gipuzkoan 2.778, 16.246 guztira.
