Hasieran oso argi ez zegoen arren, azkenean eskualdeko ia igerileku guztiak egongo dira zabalik udan. Okondo izango da salbuespen bakarra. Bertako igerilekuak ez zabaltzea erabaki zuen udalak, herritarrak babesteko. “Zaila izango litzateke distantziak mantentzea, edukieraren muga kontrolatzea eta gunearen desinfekzio eta garbiketa eskakizunak betetzea”, azaldu du tokiko erakundeak.
Hiru igerileku zabalik
Momentuz eskualdeko hiru igerileku daude zabalduta, baina beste hainbatek datozen egunetan ekingo diote funtzionatzeari. Orozkoko igerilekuak izan ziren irekitzen lehenak. Ekainaren 22an zabaldu zituzten, 315 pertsonentzako gehienezko aforoarekin. Udalak automatikoki kontrolatuko du azpiegituren betetze maila. Pertsonak zenbatzeko sistema bat jarri dute horretarako kiroldegiaren sarreran, eta ikuspen artifizialeko teknologia ere baliatuko dute. “Orozko Zabaltzen” aplikazioan zabalduko dituzte datuak, igerilekuen okupazioaren ehunekoa zehaztuta. Modu horretan, bizilagunek aukera izango dute aldez aurretik jakiteko igerilekuan zenbat plaza libre geratzen diren.
Orozko, Amurrio eta Urduñako igerilekuak zabalik daude dagoeneko. Laudio eta Aiarakoak ostiralean jarriko dira martxan
Amurrioko igerilekuak egun bat beranduago ireki ziren, hilaren 23an. Udalak azaldu du 1.200 pertsona sartzen direla azpiegituretan, baina edukiera %60ra jaitsi behar izan dutela. Hala ere, tokiko erakundeak nabarmendu du normalean jende gutxiago bertaratzen dela igerilekuetara. “Iaz, pertsona gehien egon zen egunean, 1.240 pertsona sartu ziren igerilekuetara egun osoan”. Gauzak hala, ez da aurretiazko hitzordurik eskatu behar igerilekuetara bertaratzeko, baina hainbat segurtasun neurri ezarri dira: gel hidroalkoholikoa banatu eta tenperatura neurtzen dute sarreran, eta ezin dira aldagelak, dutxak, armairuak edota iturriak erabili.
Listoi batzuen bidez kontrolatuko dute igerilekuetako edukiera, eta ordu-erdiko tarteak zehaztuko dira bainatzeko, ondoren desinfekzio lanak egingo direlako 10 minutuz. Horrez gain, aldagelak eta igerilekua itxita egongo dira 15:00etatik 16:00etara, garbitu eta desinfektatuko direlako. Urduñako igerilekuak, aldiz, iragan larunbatean ireki ziren. 11:30etik 20:30era egongo dira irekita egunero, irailaren 13ra arte. Hainbat segurtasun neurri ezarri dituzte azpiegituretan sartzeko. Sasoiko abonoak soilik onartuko dira. Hau da, ez da sarrerarik salduko.
Ostiralean gehiago
Eskualdean dauden gainontzeko igerilekuak ostiral honetan -uztailak 3- zabalduko dituzte. Laudiokoetan erdira murriztuko dute edukiera. 1.000 pertsona egon ahalko dira gehienez kirol azpiegituretan. Kontrol sistema bat ezarriko dute hori bermatzeko, ordainagiri batzuen bidez. “Ordainagiri horiek zenbakituta egongo dira, erabiltzailea instalazioan sartu den eguna eta ordua adierazita ", azaldu du Joseba Amondo kirol zinegotziak.
Jendea txandaka sartzea da asmoa. Hiru ordutegi-tarte zehaztu dituzte horretarako: 11:00-14:00, 14:00-17:00 eta 17:00-20:00. 14 urtetik gorakoek euro bat ordaindu beharko dute. Gazteagoek, aldiz, ez dute kuotarik ordaindu beharko.
Artziniegako igerilekuetako obrak uztailaren 15ean amaituko dira
Zirkulazioaren noranzkoa marraztuko dute azpiegituretan, segurtasun-distantziak errazago bete ahal izateko. Horrez gain, udalak nabarmendu du ezingo direla erabili instalazio barruko armairuak, aldagelak, dutxak, altzari publikoak, bankuak, lehorgailuak edota iturriak.
Aiarako igerilekuak ere larunbatean irekiko dira. Astelehenetik ostiralera egongo dira zabalik, 12:00etatik 21:00etara. Asteburu eta jaiegunetan, aldiz, ordubete lehenago irekiko dira. Urduñan bezala, harpidedun-txartela duten erabiltzaileak soilik sartu ahalko dira azpiegituretara.
Artziniegan, zalantzan
Artziniegako igerilekuena da oraindik argitzeke dagoen egoera bakarra. Obretan daude eta, aurreikuspenen arabera, uztailaren 15erako amaituko dira lan guztiak. Artziniegako Udalak adierazi du igerilekuak irekitzeko asmoa dutela, baina momentuz ezin dutela ezer ziurtatu, behin obrak amaituta segurtasun plana osatu beharko dutelako.