Aurrera doa Eusko Legebiltzarrak Aiaraldea ekonomikoki suspertzeko abian jarritako ponentziaren osaketa. Astelehenean -urtarrilak 25- Amurrio eta Laudioko merkatari eta industria elkarteak egon ziren Gasteizen, gaiaren inguruko analisi eta proposamenak mahaigaineratzen.
APILLek, APYMCAk eta Laudio Groupek eskualdearen egoera sozio-ekonomikoaren gaineko diagnostikoa aurkeztu zuten. Plazaratutako datuak eskualdeak bizi duen larritasunaren adierazle direla nabarmendu du Klaudio Perez Bardeci APILL merkatari-elkarteko kideak: "2019ko langabezia datua %15ekoa da, ikusteko dago 2020ak zer emaitza utzi dituen. Hori gutxi balitz, 2008tik hirugarren sektoreak enpresen %22 baino gehiago galdu du".
Hirugarren sektorearen garrantzia
Hirugarren sektoreak duen garrantzia azpimarratu zuten ponentziaren lantaldearen aurrean egindako agerraldian. Izan ere, sektoreak 2.000 lanpostu baino gehiago sortzen ditu eskualdean.
Hala, egoera ekonomikoa suspertzeko lerro estrategikoak aipatu zituzten. Zentzu horretan, hirugarren sektorea berraktibatzeko ekimenak beharrezkoak direla nabarmendu zuen Perez Bardecik: "Epe luzerako planak behar ditugu, tokiko merkataritza suspertuko duen hirigintza plan bat, merkataritzak ematen baitie herriei bizitza".
Horretarako, hainbat lan lerro abian jartzeko proposamenak egin zituzten, turismoa erakartzekoa besteak beste. "Gure kultur ondarea eta gastronomia ustiatu behar ditugu", azaldu du APILL elkarteko kudeatzaileak.
Laudioko Arza industriagunea eztabaidagai
Laudioko Arza industriaguneko bi ekipamendu tertziarioen inguruan eztabaidatu zuten ere Aiaraldeko ponentziaren asteleheneko saioan. Lidl saltokien ekipamendu logistikoa eta industriaguneko orube batean ezarri nahi den Mercadona saltokia dira bi ekipamendu horiek.
Unai Fernandez de Betoño EH Bilduko legebiltzarkidearen ustetan, lurzoruen gabeziaz gain, trenbide sarearen gainbehera dago Lidlek Laudioko industriagunetik alde egiteko arrazoien artean. Izan ere, haren iritziz, "Euskal Y" deituriko abiadura handiko sareko lanak behin bukatuta areagotu egingo da RENFEren trenbide sarearen gainbehera. Halaber, Mercadona saltokiaren harira, zalantzak azaldu zituen Fernandez de Betoñok: “Ez dut oso bateragarri ikusten gertuko hirigintzaren aldeko diskurtsoa (oso egokia dena), industrialde periferikoetan ezarri nahi diren merkataritza-zentroekin. Kontrako ideiak ezin dira aldi berean sustatu, modu koherentean”. Gainontzeko alderdiek ez dute asteleheneko saioari buruzko adierazpenik egin.
Ponentzia aurrera
Horrenbestez, Aiaraldea ekonomikoki suspertzeko ponentziak aurrera egiten jarraitzen du. Urtarrilaren 12an Aiaraldeko udalerrietako alkate eta teknikariek hartu zuten hitza, eta merkatari elkarteen diagnostiko eta gogoetak ere bilduta daude dagoeneko. Iragan irailaren 23an aurkeztu zuten egitasmoa, Laudioko kasinoan.