Bereziak izango dira aurtengo inauteriak. Inauterietako mozorro lehiaketa guztiak bertan behera geratu dira koronabirusak sortutako pandemia dela-eta. Ondorioz, herri gehienetan ez dira jarduerak antolatuko.
Ikastetxeak dira nagusiki mozorro jaiei eutsi dieten zentro edo eragile bakarrak. Horiek ere, ordea, osasun eta segurtasun neurri guztiak barne hartuta gauzatuko dituzte. "
Udalek atzera bota dituzte ohiko programak. Urduñan, Artziniegan, Okondon, Arrankudiaga-Zollon, Arakaldon, Laudion eta Amurrion ez da ekitaldirik egongo. Orozkon, aldiz, tiktok lehiaketa antolatu du udalak, Indumaren bidez.
Aiaran, ordea, bi tailer egongo dira asteburuan. Adinaren arabera bereiztu dituzte saioak, baina ordutegi bera izango dute: 17:00-19:00. Larunbatean -otsailaren 13an- Veneziako maskarak, animalienak eta superheroienak egiteko tailerra antolatu dute 4-8 urte bitartekoentzat Luiaondon. Igandean -otsailaren 14an- 9-15 urte artekoen txanda izango da, "photocallerako osagarri tailerra" egingo dute, bat-bateko argazki tailerra oinarri hartuta. Aiarako Udalak adierazi duenez, parte hartzeko ezinbestekoa da aurrez izena ematea info@aiarakoudala.eus helbidean (izen-abizena, telefonoa eta adina aipatu behar dira).
Eragileen ekimen solteak
Bestalde, badira dinamika propioak sustatu dituzten eragileak. Aiaraldea Komunikabideak, esaterako, mozorroen argazki lehiaketa antolatu du laugarrenez. Otsailaren 16ra arte aurkeztu ahalko dira irudiak, eta irakurleek erabakiko dute irudi irabazlea webguneko boto sistema bidez. Saria Laudioko Iluntze tabernarako 50 euroko afari bonoa izango da.
Aiara Dantza taldeak, berriz, Euskal Herriko aratusteak oholtzaratuko ditu otsailaren 27an Amurrio Antzokian. Urtero antolatzen dute ikuskizun bat, eta pandemiak entsegu eta emanaldiak hankaz gora jarri dizkien arren, lan berria aurkeztuko dute hilabeteko azken igandean. Ohi gisa, bi emanaldi egongo dira, 16:30ean eta 19:00etan.
Sorginlarrenek, bestalde, herri aratusteen inguruko txostena osatu du, Arabako gaiekin. "Hainbat herrietako esperientziak eta ohiturak berrartu ahala horien atzean dauden balioak landu ditugu" azaldu du Ander Fernandez Montalbanek. Gida liburua irekia da, informazio bilaketa egin dute, "baina moldaketak egingo ditugu hurrengo urteetan zehar, ahalik eta osatuena uzteko txostena".
Sorginlarrenek herri aratusteen inguruko txostena osatu du, baina informazio bilketarekin jarraituko dute unitate didaktikoa sortzeko etorkizunean
Arabako 6 pertsonaiaren istorioak eta funtzioak kontatzen dituzte bertan, besteak beste. "Hezkuntza formalean lanketa egiteko ziklo desberdinetarako ariketak proposatzen ditugu, baita bestelako eremuetan baliatzekoak ere: Guraso Elkarte, aisialdi talde, gazteleku, gaztetxe eta abarretan aplikatu daitezke". Aurrera begira, tokiko aratusteen inguruan sakondu nahiko lukete. Hargatik, sorginlarren@gmail.com helbidera informazioa bidaltzeko eskaera luzatu dute.
Horrez gain, pertsonaia mitologikoetan oinarritutako dinamika abiatu zuten urtearen hasieran. Hala, mamotxorroen istorioa eta ezaugarriak ezagutarazi dituzte:
Kirikiño Aisialdi Taldeak, azkenik, gastronomia edo sukaldaritza tailerrera egokitu du bere jarduera, "negu amaierako tostadak" egiteko errezeta proposatuta.