Maiatzaren 11n Amurrioko epaitegira jo beharko dute otsailaren 23an atxilotutako Tubacexeko hiru grebalariek. Epaileak entzungo ditu euren adierazpenak eta poliziak dituen frogekin alderatuta, erabaki beharko du beharginen aurkako akusazioek aurrera jarraitzen duten. Zehazki, desordena publikoak eragitea eta autoritatearen kontrako atentatua egozten die Ertzaintzak langileei.
Mobilizazioak
Deklarazioaren egunean sindikatuek elkarretaratzea deituko dute Amurrioko epaitegiaren aurrean, akusatuak babesteko. Gaur zehaztuko dute ordua, baina litekeena da 10:30ean kontzentratzea 11:30ak arte. Berez, deklarazioak izango dira 11:30etatik 12:30ak arte, baina Tubacexeko ordezkariek hitza hartu behar dute Eusko Legebiltzarrean eta eraikinaren kanpoaldean elkartuko dira ere grebalariak, ziurrenik 12:00etatik 13:30ak arte.
3 atxilotu egun bakarrean
Atxiloketak gertatu ziren egunean istiluak jazo ziren Laudioko Tubacex enpresako lantegiaren atarian, grebalarien eta polizien artean. Beharginek eserialdia egin zuten zuzendaritzaren autobusaren aurrean eta ertzainek borrak eta foamezko balak baliatu zituzten euren aurka.
Zehazki, bi atxilotu egon ziren goizean eta hirugarrena arratsaldean izan zen. Hainbat langilek zauriak eta kolpeak pairatu zituzten eta ESAN Ertzaintzako sindikatuak salatu zuen 15 agentek zauriturik bukatu zutela. Hori bai, guztiek izan zituzten lesio arinak.
Langileetako batek susmatzen du bere itxuragatik atxilotu zutela. Ikur antifaxistadun arropa zeramanez soinean, beharginak uste du poliziak pentsatu zuela ez zela grebalaria.