PSE-EEk "oportunistatzat" jo du EH Bilduk azken asteotan egin duen salaketa kanpaina Renfeko C-3 lineako tren zerbitzua dela eta. Koalizioak elkarretaratzeak antolatu eta mozioak aurkeztu ditu hainbat udaletan eta zinegotzi sozialistek -David Romerok eta Loli Murielek- oharra plazaratu dute aldarrikatzeko Espainiako Gobernuak inbertsioa egin duela azpiegitura normaltasunera itzultzeko.
Romerok eta Murielek defendatu dute PSOEk konpromisoa erakutsi duela Aiaraldearekin, baina ez dute ukatu pandemian eragozpenak sortu zaizkiela erabiltzaileei. Hala ere, ukatu dute zerbitzua eten denik edo inbertsioak egiteari utzi zaionik.
Kontratazioak eta lanak
Zentzu horretan, sozialistek aldarrikatu dute Aiaraldea izan dela Arabako lehen lurraldea zeinean pandemia aurreko zerbitzua berreskuratu den eta azpimarratu dute ahalegina egin dela horretarako: "58 gidari berri eta 34 agente komertzial kontratatu dira eta lan deialdi publikoa aurreikusi dute".
Inbertsioei dagokienez, zinegotziek aipatu dute Pedro Sanchez Moncloara heldu zenetik ia 5 milioi euroko gastua egin dela eskualdeko azpiegituretan; Urduña eta Amurrio arteko zubian, Amurrioko geltokiko irisgarritasunean eta Laudioko geltokiko modernizazioan, besteak beste.
Sabotajeak
Azkenik, PSE-EEko ordezkariek leporatu diote EH Bilduri ez duela aipamenik egin trenetan gertatu diren erasoei buruz. Berez, urrian zenbait sabotaje gertatu ziren C-3 linean eta horren ondorioz, 60 zerbitzu bertan behera geratu ziren. Gertakari horiek gaitzestu ordez, sozialistek uste dute koalizioak nahiago izan duela Renfeko erreputazioa kaltetzea.