Azaroaren 7an epaituko dute Tubacexeko grebalari bat, ertzain bati erasotzea leporatuta

Epaituko duten langilea eta bere senarra. / Aiaraldea.eus

Emakumeak ukatu ditu Ertzaintzaren akusazioak eta gogoratu du berak bukatu zuela medikuan, poliziak emandako kolpeen ondorioz.

Azaroaren 7an goizeko 11:15ean Gasteizen epaiketa izango du Tubacex enpresako grebalarietako batek. Emakumezkoak 15 hilabeteko kartzela zigor eskaerari egingo dio aurre, agintaritzaren kontrako erasoa egotzi baitio Ertzaintzak. Zehazki, poliziak argudiatu du ertzain bat astindu zuela eta bularrean ukabilkada eman ziola.

Tubacexeko langileak, ordea, akusazioa faltsutzat jo du eta gogoratu du Ertzaintzak hasi zituela istiluak. "Nik ez nuen ukitu, berak jo ninduen lehenik eta behin, eskuan, eta berarengana joan nintzenean aurpegiratzeko kolpea eman zidala, atxilotu ninduten. Gainera, ezkutua zuen ertzainak, nola eman nion bularrean?"

Bide batez, emakumeak azpimarratu du lesioak izan zituen bakarra bera izan zela: "Eskua inmobilizatu behar izan zidaten, porrarekin jasotako kolpearen ondorioz hatzamar bat puztu zitzaidan eta. Horrez gain, atxilotzen ninduten bitartean tira-bira izan zuten nire lankideekin eta beste kolpe bat jaso nuen lepoan. Horren ostean tiraka eraman ninduten".

Langileak jakinarazi du epaiketa hurbildu ahala, gertatutakoa salatzeko ekimenak egingo dituztela.

Istiluak

2021eko ekainaren 17an jazo ziren poliziaren oldarraldiak Amurrioko epaitegiaren aurrean. Tubacexeko grebalariek elkarretaratzea deitu zuten egun horretan, martxoaren 25ean piketean parte hartzegatik hiru lagunek deklaratu behar baitzuten.

Beharginek epaitegiaren aurrean dagoen espaloia erabiltzen ari ziren, maiatzean egindako kontzentrazioan bezala, eta Ertzaintzak agindu zien handik kentzeko. Langileek ez zutenez hori egin, argudiatuta hilabete lehenago leku berean egon zirela arazo barik, bi aldiz jo zuten ertzainek euren aurka eta hainbat lagun zauritu zituzten, grebalari bat atxilotzeaz gain.

Ekainaren 19an elkarrizketatu zuen Aiaraldea Komunikabideak atxilotutako langileak bere bertsioa azaltzeko. Gainera, Txabi Alvarado kazetariak liskarren inguruko iritzi artikulua plazaratu zuen hurrengo egunean.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide