ANALISIA

Kasualitatez gertatutako talka edo aurretik planifikatutako kriminalizazio saiakera?

Hainbat pertsona zauritu zituen atzo Ertzaintzak epaitegiaren aurrean. / Aiaraldea.eus

Poliziak behin baino gehiagotan erabili du “istiluen profesionalen tesia” Tubacexeko langileen aurkako kargak justifikatzeko. 

Atzo Amurrioko epaitegiaren aurrean gertatutakoa ezusteko handia izan zen jende askorentzat. Bi hilabete igaro dira Ertzaintzak Tubacexeko langileen aurka azken aldiz kargatu zuenetik. Atzokoa egun lasaia zirudien: beharginek elkarretaratzea deitu zuten elkartasuna adierazteko deklaratzera deituak izan ziren hiru aiaraldearrei. Hasieran hiruzpalau polizia baino ez zeuden arren, berehala agertu ziren Brigada Mugikorrekoak. Izan ere, beharginek uko egin zioten espaloitik mugitzeari, elkarretaratzea bertan egiteko baimena zutela argudiatuta. 

Poliziak manifestarien artetik sartu ziren eta nahiko gauza zentzugabea egin zuten. Izan ere, bidea oinezkoentzat libratu baino (hori zen egin nahi omen zutena) are gehiago blokeatu zuten. Handik gutxira kargatu zuten, hainbat langile zaurituz eta bat atxilotuz. 

Atzoko kargek kontraste handia egiten dute iragan maiatzaren 11n toki berean bizitakoarekin. Egun horretan Tubacexeko hiru langilek deklaratu zuten, eta manifestariek ez zuten inolako trabarik izan elkarretaratzea bide osoa okupatuz egiteko:

“Istiluen profesionalen” tesia

Atzo gertatutakoaren ostean (kargak amaitu eta poliziak langilea atxilotuta eraman eta gero) behargin batek polizia bati galdetu zion ea zergatik jokatu zuten modu horretan, eta honek erantzun zion mobilizazioetan Tubacexekoa ez zen jendea sartzen dela, eta jende hori dela istiluak probokatzen dituena.

Behargin batek polizia bati galdetu zion ea zergatik jokatu zuten modu horretan, eta honek erantzun zion mobilizazioetan Tubacexekoa ez zen jendea sartzen dela, eta jende hori dela istiluak probokatzen dituena

Poliziak behin baino gehiagotan erabili du tesi hori Tubacexeko langileen aurkako kargak argudiatzeko. Antzeko gauza bat  esan zioten greba mugagabean egondako lehen istiluetan atxilotutako langilearen emazteari, Laudioko komisaldegian. Hain zuzen, behargin horrek uste du itxuragatik atxilotu zutela, ikur antifaxistadun arropa zeramalako soinean, eta langilea ez zela suposatu zutelako ertzainek. 

Horrelako kriminalizazio saiakerak ez dira berriak. Duela ia 30 urte ere gertatzen ziren, Aceros de Llodio fabrikaren itxieran, adibidez. Beharginen mobilizazioetan “istiluen profesionalak” zeudela aipatzen zen garai  hartan hedabideetan, hemen beheko bideoan ikusi daitekeenez:  

Gauzak hala, agian ez da oso zoroa pentsatzea atzo poliziak izandako jokabide ustez “zentzugabearen” atzean horrelako beste kriminalizazio saiakera bat egon daitekeela. 

Izan ere, berez, ezberdintasun bakarra dago maiatzaren 11n eta atzo epaitegiaren aurrean egondako elkarretaratzeen artean: maiatzekoan Tubacexeko hiru behargin ziren deklaratu zutenak. Atzokoan, aldiz, eskualdeko hiru pertsona izan ziren. Hiru pertsona gazte, eta inguru politizatuetatik mugitzen direnak. 

Beraz, baliteke polizia-buruek pentsatzea atzoko elkarretaratzean “Tubacexekoak ez den jende” gehiago egon zitekeela, deklaratzera deituak zeuden gazteen profilak hori iradokitzen zielako; eta baliteke baita pentsatzea bertan kargaren bat eraginez gero baten bat atxilotzeko aukera izan zezaketela, historikoki baliatutako “istiluen profesionalen tesia” indartu eta, era berean, Tubacexeko langileen gatazka (are gehiago) kriminalizatzeko.

Baliteke polizia-buruek pentsatzea atzoko elkarretaratzean “Tubacexekoak ez den jende” gehiago egon zitekeela, deklaratzera deituak zeuden gazteen profilak hori iradokitzen zielako

Ezin da ziurtasunez jakin Ertzaintzaren atzoko asmoa hori zen edo ez. Baliteke dena kasualitatez gertatutako talka bat izatea. Hipotesi bat baino ez da. 

Baina, plana hori baldin bazen, erabat aldrebes atera zitzaien: elkarretaratzean batutako gehienak langileak ziren eta atxilotuta eraman zutena, aldiz, adin ertaineko emakume grebalaria.

Gainera, Tubacexeko gatazkaren puntu honetan, “istiluen profesionalen” tesia oso jokoz kanpo geratu da Aiaraldean. Gazteak, pentsiodunak, mugimendu feministako kideak, hainbat enpresa eta sektoreetako beharginak… eskualde oso bat batu da azken hilabeteetan eginiko mobilizazioetara. Horren adibide argia da iragan ekainaren 2an eginiko borroka egunean egondako aniztasuna. 

“En Tubacex no sobra nadie” oihukatzetik “En Aiaraldea no sobra nadie” oihukatzera pasa dira grebalariak. Tubacexeko langileen borroka eskualde osoaren defentsaren aldeko borroka bilakatu da, eta “istiluen profesionalen tesiek” nekez neutralizatu dezakete hori.  

Erlazionatuak

"Hau ez da estatu poliziala", salbu Tubacexen?

Aiaraldea

Ertzaintzaren eginkizuna eta jarrera eztabaidaren erdian egon da azken asteotan, Aiaraldeari dagokionez, Tubacexeko greban. Bereziki, otsailaren 23...

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide