Goizeko lehen ordutik atera dira kalera Aiaraldeko Mugimendu Feministako kideak. Amurrion jarri dute lehenbiziko hitzordua, herri apainketa burutu baitute lehen orduan. 12:00etan izan da zita nagusia Urduñako autokarabanen aparkalekuan, bertatik abiatu baita kotxe karabana bateratua. Zaintza sistema eta "denon bizitzak erdigunean" jartzeko asmoz gauzatu dute ekimena, hain zuzen, greba orokor feminista egitasmoa aurkeztu duten egun berean. Gainera, Orozkoko Madres Mercedarias zentroko beharginei elkartasuna eta babesa adierazi diete, greba egunak baitituzte Ibarrako egoitzan.
Mugimendu Feministak gaur aurkeztu du greba orokor feminista egiteko prozesua, zaintza eskubidearen alde
Ikasleek ere lanuzteak egin dituzte, eta Aiaraldeko Mugimendu Feministaren deialdira batu dira euren ekimen propioekin (Laudion errepidea moztu dute, eta Amurrion elkarretaratzea osatu dute Juan Urrutia plazan). Ildo beretik, Laudioko nagusien egoitzako langileek txaloka hartu dituzte kotxe karabanako partaideak.
Arratsaldean herrietan zentratuko dira ekintzak. Amurrioko manifestazioa 19:00etan izango da, eta Laudiokoa 19:30ean.
Hala ere, tokian tokiko Parekidetasun Batzordeek ere deitu dituzte elkarretaratzeak eskualde osoko udalerrietan, udalen deialdiei jarraiki.
Argazkiak: Aiaraldeko Mugimendu Feminista