Etxaurren Ikastolako Guraso Elkartearen hitzetan, haurren %90 ez da eskolara joan, bertan deitutako grebarekin bat eginez. Gainera, elkarteak adierazi du eskolara joan direnek beste irtenbiderik ez zutelako izan dela, familia horiek ez zutelako umeak norekin utzi.
Irailaren 7an hasi zituzten eskolak Etxaurrenen eta, egun horretan, hezkuntza zentrora ohikoan iristen diren zortzi autobusetatik bakarrak bete zuen bere bidea, Luiaondotik zihoanak, hain zuzen. Gaur-gaurkoz, egoerak bere horretan jarraitzen du, Eusko Jaurlaritzak autobus enpresekin dituen desadostasuna dela eta.
Guraso elkarteko kideen hitzetan ikasturte hasiera “kaotikoa eta konplikatua” izaten ari da. Egoera bereziki zaila da Etxaurrenen, landa eremuan kokatuta dagoelako eta haur gehienak ezin direlako oinez joan eskolara.
Haurrak autoz eraman beharrak denbora eta diru arazoak eragiteaz gain, baditu beste zenbait ertz: sarrera eta irteera orduetan sortzen diren auto-pilaketak, ibilbide arriskutsuak, autoak umeak eramateko aulki bereziekin hornitu behar izatea...
Haurrak autoz eramateak, denbora eta diru arazoez gain, baditu beste zenbait ertz: sarrera eta irteera orduetako auto-pilaketak, ibilbide arriskutsuak, autoak umeak eramateko aulki bereziekin hornitu behar izatea...
Momentuz, nahiz eta Aiaraldeko Hezkuntza Publikoa Bizirik plataformarekin harremanetan dauden, mobilizazioak eskola mailan planteatu dituzte, eskualdean arazo handiena duen zentroa baita Etxaurren. “Egoera ez da bera Luiaondon eta Okondon edo Amurrion eta Laudion”, azaldu dute Guraso Elkarteko kideek.
Bihar ere, mobilizazioak
Arazoa ikusarazten jarraituko dute bihar ere. Hain zuzen, haurrak autoz eramango dituzte eskolara eta atzealdeko berdegunetik oinez joango dira den-denak zentrora, agerian uzteko eskolara autobus-zerbitzurik gabe joateko ezintasuna. Joan den ostiralean, irailaren 8an, auto-karabana egin zuten eskolara bidean, autobus-zerbitzuaren berrezarpena exijitzeko.
Biharko mobilizazioaren ostean berriro ere elkartuko dira Guraso Elkarteko kideak eta hurrengo urratsak prestatuko dituzte. Azaldu dutenaren arabera, hemendik aurrera “erantzuleengan” jarriko dute fokua, eta ez haurrengan, badakitelako horiek “ez dutela arazoarekin zerikusirik”.
Gurasoek argi dute arazoa Hezkuntza Sailaren eta enpresen artean konpondu behar dela, haiek baitira “erantzuleak”. “Gu guraso elkartea gara, ez gara ez politikariak ez sindikatuak. Uste dugu Eusko Jaurlaritza eta eskola garraio enpresak direla gatazka hau konpondu behar duten eragileak. Gauzak gaizki egin dituzte eta orain akordioa lortzea dagokie. Haien artean konpondu behar dute”, azaldu dute.