Urte oparoa izan da 2023a Aiaraldea Komunikabidearentzat. 243.348 erabiltzailek bisitatu dute guztira Aiaraldea.eus ataria, 2,18 milioi orri ikusita guztira. Egun oparoena maiatzaren 28a izan zen. 3.920 erabiltzaile sartu ziren egun horretan atarira Udal eta Foru Hauteskundeak jarraitzeko, eta 27.735 orrialde ikusi zituzten guztira.
Eta zeintzuk izan dira ikustaldi gehien izan dituzten edukiak? Alde batetik, aipatu beharra dago gehien ikusten diren orriak ez direla, berez, edukienak. Jende asko Aiaraldea.eus atriko azalera sartzen da eguneko titular nagusiak errepasatzeko, edo atal konkretuak bisitatzen ditu, herri konkretu bateko albisteak, argazki galeriak edota agenda, besteak beste. Gauzak hala, atal horiek dira bisitatuenak.
Horrez gain, Udako Argazki Lehiaketa eta Indarkeria matxistaren aurkako dantza lehiaketak ere ikustaldi asko pilatu dituzte.
Kazetaritza edukiei dagokionez, aldiz, hauek dira 2023an ikustaldi gehien pilatu dituztenak:
1. Unai Isasiri bere atxiloketaren ostean eginiko elkarrizketa: Unai Isasi amurrioarra martxoaren 3an atxilotu zuen Ertzaintzak Gasteizen eginiko manifestazioaren ostean. Aiaraldea Komunikabideak elkarrizketa egin zion gero, eta 3.276 ikustaldi izan ditu eduki horrek.
2. Garazi Abrisketari eginiko elkarrizketa: Garazi Abrisketa zolloarra ama izan zen maiatzean, baina bere alaba hilik jaio zen eta bizipen horri buruz mintzatu zen Aiaraldea Komunikabidearekin. 3.190 ikustaldi izan ditu elkarrizketak guztira.
3. Aretako Eskolako 2 urteko gelaren itxiera: Aretako Eskolako 2 urteko gela itxiko zutenaren albisteak interes handia sortu zuen baita, 2.709 ikustaldi izan baitzituen guztira.
4. Udal eta Foru hauteskundeen gauean 3 ordu baino gehiagoko zuzeneko emisioa egin zuen Aiaraldea Komunikabideak, eta 2.665 ikustaldi izan zituen orotara.
5. Martxoan hilik topatu zuten Laudioko Gardea auzoan galdutako emakume bat. 2.536 ikustaldi izan zituen albisteak.