Aiaraldeko Eskualdeko Plan Estrategikoa "berehala" onartu behar dela uste du EH Bilduk, eta hori eskatzeko mozioak aurkeztu ditu azken hilabeteetan hainbat Udaletan. Amurrion, adibidez, martxoko udalbatzan aurkeztu zuten, baina ez zen aurrera atera, EAJk eta PSE-EEk aurka bozkatu zutelako.
Bi gauza eskatu zituen koalizioak mozio horretan: Arabako Foru Aldundirari eta Eusko Jaurlaritzari eskatzea behin betiko Eskualdeko Plan Estrategikoa adostu eta onartzea, "udalen eta eragileen ekarpenak" kontuan hartuta.
Horrez gain, Berehalako Jarduera Planean zehaztutako 33 ekintzak "epe laburrean" garatzeko neurriak ere eskatzen dizkie testuak bi erakundeei. Izan ere, hiru urte igaro dira inbertsio plan hori egin zenetik, baina ekintzen %3,3a baino ez da bete, koalizioaren hitzetan. "Neurriak berandu datoz, baina, hala ere, beti dira ongi etorriak", nabarmendu dute EH Bilduko kideek.
Urduñan ere
Urduñan ere testu bera aurkeztu zuen talde subiranistak, eskaera berdinekin. Horrez gain, beste mozio bat ere eraman zuten hiriko plenora, Arrastaria eta Saratxoko adinekoak Urduñako egoitzara sartzea ahalbidetzea eskatzeko. EH Bilduren iritziz, modu horretan adinekoak ez lirateke joan beharko beste udalerri batzuetako egoitzera.
Talde politikoak argudiatu du egoitza batean sartzeak "sentimendu negatiboak" sortu ditzazkeela, eta egoera "gogorragoa" izan daitekeela "errotzerik ez dagoen herri batera joanez gero". "Adinekoak beren familia eta komunitate inguruan biziz gero, haien ongizate emozionala sustatzen da eta komunitatearen gizarte-sarea indartzen da".