Ekonomiaren esparruan lanean ari diren zenbait hedabidek jakinarazi dute Tubacexek NTS Amega Global enpresaren kapitalaren %51 saldu duela. Konpainia hori multinazionalaren filiala da Arabiar Emirerrietan eta, antza, Abu Dhabi National Oil Companyk (ADNOC) erosi du. Dirudienez, operazioa Alpha Dhabi Holding funtsaren bitartez egikaritu dute. Funts hori NTS Amega Globalen sartu zen iaz.
Momentuz, ez dago informaziorik salmentaren prezioari buruz, baina gogoratu beharra dago NTS Amega Globalek Arabiar Emirerrietan ez ezik, beste sei herrialdetan ere dituela lantegiak, Norvegian, Ameriketako Estatu Batuetan edota Kanadan, besteak beste.
Argitu gabeko beste puntu bat da nola bateratuko den operazio hau maiatzean Mubadala Investment Companyri egindako salmentarekin. Salmenta horretan, Abu Dhabin eraikiko duten lantegiaren %49 erosi zuen Arabiar Emirerri Batuko funts subiranoak, 138 milioi euroren truke.
Tubacexek, antza, azpimarratu du erabaki horiek enpresako 2027 urterako planarekin lotuta daudela. Estrategia horren azken helburua da 1.200 eta 1.400 milioi euro arteko fakturazioak lortzea, eta horretarako bazkideen bila aritu dira.
Azkenik, aipatu behar da ADNOC badela ere Tubacexeko bezero nagusiena Arabiar Emirerrietan. Izan ere, 10 urteko kontratua sinatu dute 30.000 altzairu tona ekoizteko berarentzat.
Tubacexeko zuzendaritzak azaldu zuen uztailean, bere ustez, Abu Dhabiko lantegiak eta kontratuak lan gehiago erakarriko dutela Aiaraldera, baina enpresa batzordeak zuhurtziaz hartu du han eraikitzen ari diren lantegiaren proiektua.