Aiaraldean energia berriztagarriei lotutako beste azpiegitura bat eraikitzeko asmoa zabaldu dute gaur bertan. Hain zuzen, Eusko Jaurlaritzak jakinarazi du Feroskana zentral eolikoaren goi-tentsioko linearen baimena eta ingurumen inpaktu txostenaren informazio publikorako epea hasi duela.
Hau da, 30 egun egongo dira alegazioak aurkezteko horren kontra. Berez, Aiaraldea zeharkatuko lukeen goi-tentsioko lurrazpiko linea hori Bedia, Usansolo eta Zeberio artean eraiki nahi duten Feroskana zentral eolikoaren energia garraiatuko luke Laudioko azpiestazio elektrikoraino.
Horretarako Arakaldo eta Orozko arteko Untzueta mendia gurutzatu eta Laudion dagoen azpiegitura energetikora eramango luke elektrizitatea. Usi auzoa igaroko du (Aretako autopistako ordain-saritik gertu).
Aiaraldeko Mendiak Bizirik plataformak iragarri du alegazioak prestatu eta aurkeztuko dituela, baina, halaber, azpimarratu du Mendi zentral eolikoarenak lantzen ari direla jadanik. Zentral eoliko horrek Amurrion eragingo luke, nagusiki. Zehazki, San Roke auzunetik gertu eta Elexazar aztarnategitik ez oso urrun kokatu nahi dute.
Feroskana zentral eolikoaren bultzatzailea Ferosca Wind enpresa da, zeinak Ferosca I zentral eolikoa ezartzeko asmoa duen Laudio eta Orozko artean. 1.000 alegazio baino gehiago jaso ditu egitasmoak Aiaraldeko Mendiak Bizirik plataformak sustatuta, baina Udalek ere tramitatu dituzte proiektuaren aurkako argudioak.