Aiaraldeko C-3 lineako zenbait erabiltzaile (EHUko garraio zuzenaren falta salatu dutenak, besteak beste) Aiaraldea Komunikabidearekin jarri dira harremanetan azpimarratzeko Renfek urriaren 6an indarrean jarritako ordutegi berriekin, zerbitzua %30ean baino gehiago murriztu duela Eusko Jaurlaritzak lanegunetan. Izan ere, EAEk hartu ditu garraio eskumen horiek berriki.
Berez, urtarriletik uda bitartean C-3 lineak 147 tren zerbitzu eskaini ditu Bilboko Abandoko geltokia eta eskualdea lotzeko (unitate guztiak ez ziren Urduñara heltzen). Urrian abiatutako ordutegi berriekin, ordea, 102 tren zerbitzu daude, hau da, %30ean baino gehiago txikitu da tren kopurua eskualdea eta Bizkaiko hiriburua lotzeko.
Berez, 2024ko abenduan Renfek zerbitzu oparoa ezarri zuen eta 15 minuturo tren bat eskaini du urte erdiz.
CIVIS trenik ez eta bidaia luzeagoak
Aiaraldeko bidaiariek azaldu dute garraio publikoko zerbitzuak okerrera egin duela arlo gehiagotan: "Laudiotik ateratzen ziren trenek 29 minutuko (CIVIS) eta 32 minutuko iraupena zuten eta Orduñatik etorritakoek 33 minutuko iraupena zuten. Orain, tren guztiek 39 minutu behar dute bidaia egiteko".
Iraupenaren luzera handitu izana geltoki guztietan gertatu da eta, esaterako, egun, Urduñatik Bilbora joateko ordubeteko bidaia egin beharra dago.
Aipatu beharra dago CIVIS trenak udan desagertu zirela, urtaro horretako ordutegiekin.
"Ezerosotasuna"
Aiaraldea Komunikabidearekin harremanetan jarritako erabiltzaileek gaineratu dutenez, aldaketek eragina izan dute ere bidaiaren esperientzian, trenak gainezka baitaude eta ezerosoagoa da garraio publikoa baliatzea.
Egoera horiek arazoak sortzen dizkiete hainbat langile eta ikasleri, pasa den astean ere salatu zuten moduan. Zehazki, tren zerbitzuaren falta bereziki nabaria da gauez.
Hauek dira urriaren 6tik indarrean dauden ordutegiak:
Urtarriletik ekainera arte, aldiz, honako hauek egon ziren:
