Tokikom Saria jaso du Aiaraldea Komunikabideak gaur goizean, Eduki onenaren kategorian. Aitor Aspuru Saezen Jesus Garcia Ferreiro: mina jasanezin bilakatzen denean erreportajea saritu dute Mondragon Unibertsitateko Kanpusean eginiko ekitaldian, eta kazetari laudioarra igo da oholtzara aitortza jasotzera.
Suizidioa du ardatz Aspururen lanak, bere gaztetako laguna izan zen Jesus Garcia Ferreiroren kasutik tiraka. Jorratutako gaia eta modua nabarmendu ditu epaimahaiak: "Lan mamitsu hau kazetariaren esperientziatik abiatzen da erreporterismoa lantzeko modu aberasgarria aplikatzeko. 1990. hamarkada amaierako kasu erreal batetik tiraka, gertakaria bizi izan zuten inguruko pertsonen, tokiko elkarteen, ikastetxeen eta adituen adierazpenak uztartzen ditu, ibilbide interesgarri eta erakargarria osatuz esperientzia pertsonaletik suizidioaren errealitate orokorrera. Gainera, kontakizunari balio praktikoa gehitzeko, ikastetxeentzako gida pedagogikoa eta podcasta ere landu dute erreportajeko protagonistekin".
Artikuluari buruz mintzatu ziren egilea eta Arantza Fernandez Mariño duela urtebete baino gutxiago Euskadi Irratian.
Hiru saritu eta aipamen berezi bat
Anaitze Aguirre Larretak (EHU), Edorta Arana Arrietak (EHU) eta Amaia Pavon Arrizabalagak osatu dute Tokikom Sarien aurtengo epaimahaia. Beste lan hauek ere saritu dituzte:
- Azalik onenaren saria: "Keinu hizkuntza" (Puntua)
- Ikus-entzunezko onenaren saria: "Lodifobiaren aurkako ahotsak" elkarrizketa sorta (Antxeta Irratia)
- Aipamen berezia: Podcast gela ekimena (Goiena)
Hemen ikusi daitezke finalista geratutako lan guztiak.
