Goizeko mobilizazio eta adierazpen instituzionalen ostean, ehunka herritar atera dira kalera gaur arratsaldean Aiaraldean indarkeria matxistaren aurrean "erresistentzia feminista" aldarrikatzeko.
Arespalditzakoa izan da lehen zita, 17:30ean. Bertako hesiak apaindu dituzte lehenbizi, eta errepidera begira egin dute protesta gero. Artziniegan eta Okondon, aldiz, ordu erdi geroago egin dituzte elkarretaratzeak.
Urte honetan zehar eginiko lana balioan jarri dute Artziniegako Talde Feministako kideek. "Elkartu egin gara, begietara begira, eta komunitatean lan egin dugu, urratsez urrats, hemen inor ez dadin bakarraik geratu", nabarmendu dute. Azaldu dutenez, azken hilabeteetan hainbat eraso atera dira argitara udalerrian, "eta ez da isiltasunik, ez zalantzarik egon. Elkartasuna egon da. Babesa. Salaketa". Ziurtatu dutenez, "ahotsa altxatu" dute erasotzaileen aurka, "baita beste alde batera begiratzen dutenen aurka ere".
Aretan ekintza bikoitza egin dute bertako emakumeek. Txoko morea inauguratu dute Kultur etxean, eta elkarretaratzea egin dute jarraian Altamira plazan.
Gainontzeko herrietan, aldiz, 19:00etan egin dituzte mobilizazioak. Laudion ekintza egin du Aiaraldeko Gazte Feministak taldeak tren geltokiko zubian, eta ondoren ohiko kalejira egin dute Amagoia Elezkanoren lorategiraino, 2013an bere bikotekideak eraildako emakume hori gogora ekartzeko.
Arrankudiaga-Zollon, aldiz, ekimena egin dute bertako emakumeen sareko kideek, indarkeria matxistak eraildako emakume guztiak gogora ekartzeko.
Argazkiak: Arrankudiaga eta Zolloko Emakume Sarea, Samu Pasandin Sanchez, Ainara Sanchez, Aretako Emakumeak, Aimar Gutierrez Bidarte, Aitor Aspuru Saez, Txabi Alvarado Bañares