Santiago Abascal Escuza hil da gaur Galdakaoko ospitalean, 67 urte zituela.
Amurrioarrak ia 30 urte eman ditu popularren artean. 1987an Arabako biltzarkide izan zen eta 1995ean ardura hori berriro hartu ez ezik, Amurrioko zinegotzia ere izendatu zuten. Hurrengo hauteskundeetan, 1999an, 2003an, 2007an eta 2011n alegia, bi karguak hartu zituen bere gain.
Gainera, 2003. urtean Espainiako Kongresuan aritu zen Rafael Cámara Rodríguez Valenzuela ordezkatzeko, urtebetez.
Hori gutxi balitz, hainbat eskumen izan zituen alderdi popularrean: Aiarako presidente hautatu zuten 2004an eta Arabako zein Euskadiko batzordeetako kide izan zen.
Alderdiarekin desadostasunak
PP uztea erabaki zuen Santiago Abascalek iaz, ez baitzuen bat egiten Mariano Rajoyren ildo politikoarekin, bereziki Ezker Abertzaleari zegokionez.
Dena den, ez zuen bere ibilbidea bertan behera utzi eta irailaren 25eko Legebiltzarreko hauteskundetan Vox alderdiaren zerrendaburu gisa aurkeztu zen.
Santiago Abascal Conde da erakunde horren sortzailea, bere semea. Berez, leinu politikoa da Abascalena, Amurrioko alkate frankista izan baitzen hildakoaren aita 60ko eta 70eko hamarkadetan.
Erasoak eta ustelkeriaren itzala
Santiago Abascalen dendak zenbait eraso eta sabotaje jaso zituen 1999an. Halaber, eraso batean jazotako kalteak konpontzeko PPk zenbait diru eman zion legez kanpoko finantzazioa baliaturik.
Santiago Abascal Escuza politikaria hil da
Santiago Abascal Escuza zendu da gaur. Amurrioarrak ibilbide luzea egin du politikan; gehiena PPn, nahiz eta azken urtean Mariano Rajoyren alderdiarekin desadostasun ugari izan eta Vox-en -bere semearen erakundearen- zerrendaburua izan zen Legebiltzarreko hauteskundetan.
LAGUN AGURGARRIA:
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide